Ole Gunnar avuga ko Manchester United igomba guharanira kugera ku rwego rwa Barcelone
Ahavuye isanamu, Reuters
Umutoza Ole Gunnar Solskjaer wa Manchester United ahoberana na rutahizamu Lionel Messi wa Barcelone ubwo umukino wari urangiye
Umutoza Ole Gunnar Solskjaer wa Manchester United avuga ko ikipe ye igomba "guharanira kugera ku rwego rwa Barcelone" nyuma yaho iyi kipe yo muri Espanye ibasezereye mu irushanwa rya Champions League ry'uyu mwaka.
Lionel Messi yafashije Barcelone gutsinda Manchester United ibitego 3-0 muri uwo mukino wo kwishyura wa kimwe cya kane wabaye ejo ku wa kabiri, imikino yombi ikaba irangiye ku ntsinzi y'igiteranyo cy'ibitego 4-0.
Ole Gunnar yagize ati: "Niba dushaka kongera kuba ku rwego rw'ukuri, imigenzo y'ukuri ya Man Utd, tugomba guhatana na Barcelone".
"Mu mikino yombi, bari hejuru y'urwego rwacu nk'inshuro ebyiri".
Messi yatsinze ibitego bibiri mu minota ine yo mu gice cya mbere, nuko Philippe Coutinho aza gushyiramo icya gatatu ku munota wa 61 w'umukino.
Manchester United yagowe no guhamisha hamwe Barcelone, ndetse mu mikino yombi yashoboye gutera mu izamu amashoti atatu gusa.
Aganira na televiziyo BT Sport, Ole Gunnar yongeyeho ati: "Ngomba kuvuga ko Lionel Messi ari ku rwego rwo hejuru ndetse birumvikana ni we wahinduye umukino. Ku bitego 2-0, nyuma y'akanya gato, umukino wari umaze kurangira".
"Ari ku rwego rundi, we na Cristiano Ronaldo ni bo bakinnyi b'intyoza kurusha abandi babayeho mu myaka 10 ishize, buri wese ibyo arabyemera".
"Messi yagaragaje ubuhanga bwe".
Ahavuye isanamu, Getty Images
Manchester United ntirongera kugera muri kimwe cya kabiri cya Champions League kuva mu mwaka wa 2011 ubwo yarangizaga iri ku mwanya wa kabiri inyuma ya Barcelone yegukanye igikombe
Manchester United ifite akazi gakomeye ko kubona itike yo gukina muri Champions League mu mwaka utaha w'imikino, mu mikino itanu yayo isigaye ya shampiyona ya Premier League yo mu Bwongereza.
Ubu iri ku mwanya wa gatandatu ku rutonde rw'agateganyo, ikaba irushwa amanota abiri na Arsenal iri ku mwanya wa kane, ndetse ku cyumweru izaba yerekeje ku kibuga cya Everton mbere yuko yakira Manchester City mu mukino wo ku itariki ya 24 y'uku kwezi kwa kane.
Ole Gunnar yongeyeho ati: "Turashaka kongera gukina iyi mikino mu mwaka utaha, rero icyumweru kiri imbere kirakomeye kuri twe".
'Twatanze ibyishimo'
Guhera mu mwaka wa 2011, Manchester United ntirigera igera muri kimwe cya kabiri cya Champions League, kandi yari iri gukina imikino ya kimwe cya kane bwa mbere mu myaka itanu ishize.
Ole Gunnar avuga ko hakiri "ibyo gukora".
"Twakomeje kubivuga ko bitari buhinduke muri iri joro [ryo ku wa kabiri] kandi imyaka micye iri imbere izaba ikomeye kuri twe kugira ngo tugere ku rwego rwa Barcelone".
Barcelone yari imaze gusezererwa muri kimwe cya kane cya Champions League inshuro eshatu zikurikirana, harimo no gutsindwa bitunguranye na Roma mu mwaka ushize w'imikino, ariko ubu yageze muri kimwe cya kabiri bwa mbere guhera mu mwaka wa 2015 ubwo iheruka gutwara igikombe cy'iri rushanwa.
Kapiteni wayo Messi yavuze ko imikinire yabo yagaragaje "abo turi bo".
"Twatanze ibyishimo kandi dukina umukino unogeye ijisho".
