Umutoza Pochettino wa Tottenham yasezereye Man City avuga ko abakinnyi be ari 'intwari'
Ahavuye isanamu, PA
Mauricio Pochettino yishimira intsinzi hamwe n'abakinnyi n'abafana ba Tottenham nyuma y'ifirimbi ya nyuma ku kibuga Etihad cya Manchester City
Umutoza Mauricio Pochettino wa Tottenham yashimye abakinnyi be yise "intwari" nyuma yo kubona itike ya kimwe cya kabiri basezereye Manchester City mu mukino wa kimwe cya kane cya Champions League.
Mu mukino udasanzwe wabereye ku kibuga Etihad cya Manchester City mu ijoro ry'ejo ku wa gatatu, Tottenham yatsinzwe ibitego 4-3 ariko iba ari yo ikomeza nyuma yuko yari yatsinze umukino ubanza ku gitego 1-0, cyiyongera ku bitego yatsindiye hanze ku kibuga cya Manchester City.
Pochettino yagize ati: "Birenze kwishima, birenze kugira ishema".
Ikipe ye izakina na Ajax yo mu Buholandi muri kimwe cya kabiri cy'iri rushanwa, mu gihe Liverpool yaraye isezereye FC Porto yo muri Portugali yo izakina na Barcelone yasezereye Manchester United.
Yongeyeho ati: "Kugera muri kimwe cya kabiri byari inzozi, none ubu twahageze. Abakinnyi banjye ni intwari".
Manchester City yasaga n'igiye gukomeza ubwo yari ifite ibitego 4-2 habura iminota irenga gato 15 ngo umukino urangire, mbere yuko Fernando Llorente atsinda igitego cya gatatu cya Tottenham akayiha amahirwe yo gukomeza hagendewe ku mategeko ajyanye no gutsindira igitego hanze.
Ahavuye isanamu, Getty Images
Guardiola yatsindiye igikombe cya Champions League inshuro ebyiri atoza Barcelone, ariko ntabwo arashobora kongera kubikora haba muri City cyangwa muri Bayern Munich mbere yaho
Nyuma yaho mu minota y'inyongera, Raheem Sterling yaje gutsinda igitego cyajyaga gutuma Manchester City ikomeza, ariko videwo yunganira umusifuzi igaragaza yo yari yaraririye, icyo gitego kirangwa.
Umutoza Pochettino yagize ati: "Iyi ni yo mpamvu dukunda umupira w'amaguru. Uyu munsi [ku wa gatatu] twagaragaje gukura mu mutwe no mu myitwarire, kandi wari umukino utakwiyumvisha".
Abajijwe niba ikipe ye ishobora gutsindira igikombe cya Champions League, Pochettino yagize ati: "Ntekereza ko uyu munsi [ku wa gatatu] ndetse no mu cyumweru gishize dukina na Manchester City, twerekanye ko byose bishoboka mu mupira w'amaguru".
Umutoza Pep Guardiola wa Manchester City yavuze ko gusezererwa na Tottenham "bibabaje cyane", ariko ko ari "ukubyakira".
