Urutonde rw'abakinnyi b'umupira w'amaguru b'abagore bahatanira igihembo cya BBC cya 2019 - tora uwo uha amahirwe

Pernille Harder, Ada Hegerberg, Lindsey Horan, Sam Kerr, Saki Kumagai

Urutonde rugufi rw'abakinnyi b'abagore bahatanira igihembo cy'umukinnyi wa BBC muri uyu mwaka wa 2019 rwatangajwe - kandi ubu ushobora gutora umukinnyi ushaka ko atsindira icyo gihembo.

Abakinnyi batanu bahatanira iki gihembo gitangwa n'igice gitangaza ibiganiro mu ndimi zitandukanye ku isi cya BBC, BBC World Service, batoranyijwe n'itsinda ry'impuguke, zirimo abatoza, abakinnyi n'abanyamakuru.

Image caption Umwongerezakazi Lucy Bronze ni we watsindiye iki gihembo ubushize

Abo bakinnyi ni:

  • Pernille Harder - rutahizamu wa Vfl Wolfsburg
  • Ada Hegerberg - rutahizamu wa Olympique Lyonnais
  • Lindsey Horan - ukina hagati muri Portland Thorns
  • Sam Kerr - rutahizamu wa Chicago Red Stars na Perth Glory
  • Saki Kumagai - myugariro wa Olympique Lyonnais

Kanda hano urebe video bijyanye.

Gutora bizarangira ku wa kane ku itariki ya kabiri y'ukwezi gutaha kwa gatanu i saa mbiri za mugitondo ku isaha ngengamasaha ya GMT (08:00 GMT).

Nuko uwatsindiye iki gihembo atangazwe ku wa gatatu, ku itariki ya 22 y'ukwezi kwa gatanu mu biganiro bitandukanye byo kuri BBC World Service ndetse no ku rubuga rwa interineti rwa BBC, mu ishami ry'imikino.

Ushobora gutora hano.

Dore andi makuru kuri aba bakinnyi batanu bahatanira iki gihembo, kiri guhatanirwa mu mwaka wacyo wa gatanu.

Pernille Harder

Uwufise ububasha kw’isanamu Reuters

Imyaka: 26 Igihugu: Denmark Inshuro amaze guhamagarwa mu ikipe y'igihugu: 110

Ikipe akinira: VFL Wolfsburg Umwanya akinaho: Rutahizamu

Harder yasoje umwaka w'imikino wa 2017-2018 ari we ufite ibitego byinshi muri shampiyona y'igihugu y'abagore yo mu Budage n'ibitego 17, ndetse afasha ikipe ye ya Wolfsburg gutwara ibikombe bibiri bya shampiyona yikurikiranya.

Kandi yanakinnye ndetse atsinda igitego mu mukino wa nyuma wa Champions League yari akinnye bwa mbere mu mwaka ushize bakina n'ikipe ya Olympique Lyonnais, ariko ikipe ye ntiyatwara igikombe nyuma yo gutsindwa ibitego 4-1.

Ariko Harder yegukanye igihembo nk'umukinyi ku giti cye, amaze gutorwa n'impuzamashyirahamwe y'umupira w'amaguru ku mugabane w'Uburayi, Uefa, nk'umukinnyi w'umwaka wa 2018. Yanabaye umukinnyi wa kabiri mu bahataniye igihembo cya Ballon d'Or.

Ada Hegerberg

Uwufise ububasha kw’isanamu RONNY HARTMANN

Imyaka: 23 Igihugu: Norway/Norvège Inshuro amaze guhamagarwa mu ikipe y'igihugu: 66

Ikipe akinira: Olympique Lyonnais Umwanya akinaho: Rutahizamu

Mu mwaka ushize w'imikino, Hegerberg yatsindiye igikombe cya Champions League ku nshuro ya gatatu yikurikiranya ari kumwe na Olympique Lyonnais, ndetse asoza irushanwa n'umuhigo w'ibitego 15 mu gihe ikipe ye yarangizaga itwaye ibikombe bibiri - icya shampiyona y'Ubufaransa ndetse n'icya Champions League.

Kuva yagera muri iyi kipe mu mwaka wa 2014, Hegerberg amaze kuyitsindira ibitego 193, birimo 19 yatsinze mu mikino 18 ya shampiyona y'uyu mwaka w'imikino. Ku mpeshyi y'umwaka ushize, yashyize umukono kuri kontaro nshya y'igihe kirekire muri iyi kipe.

Hegerberg kuri ubu utagikinira ikipe y'igihugu ya Norvège, ni we wabaye uwa mbere watsindiye igihembo cya Ballon d'Or y'abagore mu mwaka wa 2018.

Lindsey Horan

Uwufise ububasha kw’isanamu MARK RALSTON

Imyaka: 24 Igihugu: Leta Zunze Ubumwe z'Amerika Inshuro amaze guhamagarwa mu ikipe y'igihugu: 62

Ikipe akinira: Portland Thorns Umwanya akinaho: Hagati mu kibuga

Mu kwezi kwa cyenda k'umwaka ushize wa 2018, Horan yatangajwe nk'umukinnyi uhiga abandi muri shampiyona y'igihugu y'abagore muri Amerika.

Aba abaye umukinnyi wa mbere w'ikipe ya Portland Thorns utsindiye icyo gihembo, nyuma yo gutsinda ibitego 13 no gutanga imipira (amapasi) ibiri yavuyemo ibitego mu mikino 22 ya shampiyona.

Horan yafashije ikipe ye kugera ku mukino wa nyuma wa shampiyona, isoza iri ku mwanya wa kabiri, ariko ikipe ye itsindwa na North Carolina Courage muri uwo mukino wa nyuma.

Sam Kerr

Uwufise ububasha kw’isanamu DANIEL POCKETT

Imyaka: 25 Igihugu: Australia Inshuro amaze guhamagarwa mu ikipe y'igihugu: 67

Ikipe akinira: Perth Glory na Chicago Red Stars Umwanya akinaho: Rutahizamu

Kerr kuri ubu ukinira amakipe yombi ya Perth Glory na Chicago Red Stars, ni we mukinnyi w'ibihe byose umaze gutsinda ibitego byinshi muri shampiyona yo muri Amerika, ndetse mu kwezi kwa mbere uyu mwaka yesheje uwo muhigo no muri shampiyona y'abagore muri Australia.

Mu mwaka wa 2018, yatsindiye bwa kabiri yikurikiranya igihembo gihabwa umukinnyi wahize abandi cy'urukweto rwa zahabu muri shampiyona, asoza afite ibitego 16 ndetse atanga n'imipira ine yavuyemo ibitego mu mikino 19 mu ikipe ya Red Stars.

Kerr yagizwe kapiteni wa Australia mu kwezi kwa kabiri uyu mwaka, ndetse afasha ikipe y'igihugu cye gutsindira igikombe cyayo cya mbere cy'ibihugu, mu irushanwa rya mbere ryahuje amakipe ane y'ibihugu bya Australia, New Zealand, Koreya y'epfo na Argentine.

Saki Kumagai

Uwufise ububasha kw’isanamu FRANCK FIFE

Imyaka: 28 Igihugu: Ubuyapani Inshuro amaze guhamagarwa mu ikipe y'igihugu: 102

Ikipe akinira: Olympique Lyonnais Umwanya akinaho: Myugariro cyangwa ukina hagati agaruka inyuma gufasha ba myugariro

Kumagai wafashije ikipe y'igihugu cye gutwara igikombe cy'isi, yanabaye kapiteni w'Ubuyapani bwatsindiye igikombe cyo mugabane w'Aziya cyo mu mwaka ushize wa 2018 - cyari kibaye icya mbere Ubuyapani butwaye mu myaka ine ishize.

Yari umwe mu bakinnyi b'ikipe ya Olympique Lyonnais yatwaye ibikombe bibiri mu mwaka w'imikino wa 2017-2018, ndetse amaze gutsindira ibikombe bitatu bya Champions League.

Kumagai yatanze umusanzu we mu bwugarizi bwaciye umuhigo bw'iyi kipe muri shampiyona y'Ubufaransa; iyi kipe yatsinzwe ibitego bitandatu mu mikino 20.

Ibindi bisa n’ibi