Umutoza Ole Gunnar wa Man United yasabye imbabazi abafana
Ahavuye isanamu, Getty Images
Ole Gunnar Solskjaer yavuze ko azamuye amaboko asaba imbabazi abafana b'iyi kipe
Umutoza Ole Gunnar Solskjaer w'ikipe ya Manchester United yasabye imbabazi abafana b'iyi kipe kubera kwitwara nabi kur munsi w'ejo ku cyumweru imbere y'ikipe ya Everton yabatsinze ibitego 4-0.
Manchester United imaze gutsindwa imikino itandatu mu mikino umunani iheruka gukina mu marushanwa yose. Ubu iri ku mwanya wa gatandatu muri shampiyona.
Ole Gunnar yabwiye televiziyo Sky Sports ati: "Kuva ifirimbi itangiza umukino ivuze, ibintu byose byagenze nabi".
Yongeyeho ati: "Ndagira ngo nsabe imbabazi abafana. Nibo bonyine uyu munsi babashije guhagarara bemye, twe byatunaniye".
Ole Gunnar yavuze ko Everton yabarushije mu bice byose, bityo asaba imbabazi ku kwitwara nabi kw'ikipe ye.
Ibitego bya Richarlison, Gylfi Sigurdsson, Lucas Digne na Theo Walcott, n iko gutsindwa kwa mbere gukabije kwa Manchester United muri uyu mwaka w'imikino. Kuri uyu mukino, iyi kipe yageze ku munota wa 86 itaratera na rimwe mu izamu rya Everton.
Ku wa gatatu izakina na mukeba kandi w'umuturanyi Manchester City we uhanganiye igikombe na Liverpool.
Umutoza Ole Gunnar yavuze ko uko bakinnye kwa Everton bidakwiriye ikipe ya Manchester United.
Ahavuye isanamu, Getty Images
Manchester United yageze ku munota wa 86 itaratera na rimwe mu izamu rya Everton
Ati: "Kuva kuri njye kugera ku bakinnyi twatengushye abafana, twatengushye ikipe. Uko twakinnye biragoye kubisobanura kuko ni bibi cyane".
"Tuzamuye amaboko dusaba imbabazi buri wese ufite aho ahuriye n'ikipe. Dufite amahirwe meza yo kwikosora ku wa gatatu".
Manchester ntabwo yirutse
Ikigereranyo rusange ikipe ya Manchester yirutse ku mukino na Everton ni kilometer 8, kiri munsi y'icya Everton. Ole Gunnar avuga ko kutiruka biri mu byabakozeho.
Ati: "Nifuza ko ikipe yanjye iba ikipe ikora kurusha izindi muri shampiyona, ibi niko byari bimeze ubwo twatozwaga na Sir Alex [Ferguson] - [Ryan] Giggs, Becks [David Beckham], Gary Neville, Denis [Irwin] - nubwo wabaga ufite impano ingana ite, warirukaga kurusha abandi".
Umunyezamu David de Gea wari kapiteni kuri uyu mukino yanditse ku rubuga nkoranyambaga rwa Twitter ko ibyababayeho kwa Everton bigoye kubishyira mu magambo kubera gukina nabi kandi bambaye umwambaro w'ikipe ikomeye.
Mu mibare
- Manchester United imaze imikino 11 yikurikiranya kuri burimukino yinjizwa igitego. Ibi byaherukaga mu kwa cumi na kabiri mu 1998.
- Uyu mwaka w'imikino bamaze gutsindwa ibitego 48 muri shampiyona, nibyo byinshi batsinzwe kuva mu mwaka w'imikino wa 1978-79 aho batsinzwe 63.
- Everton yaherukaga gutsinda Manchester United ibitego byinshi mu 1984 ubwo yayitsindaga 5 - 0.
- Mu marushanwa yose, iyi ni inshuro ya gatanu batsinzwe bikurikiranya bagiye gusura indi kipe. Inshuro nk'izi zaherukaga mu 1981 Manchester United itozwa na Dave Sexton.
