James Milner avuga ko azafana Man Utd 'bwa mbere mu buzima' bwe ikina na Man City nubwo atazareba umukino

Ku cyumweru, igitego cya penaliti cya James Milner cyahesheje intsinzi Liverpool y'ibitego 2-0 mu mukino wayihuzaga na Cardiff Uwufise ububasha kw’isanamu Reuters
Image caption Ku cyumweru, igitego cya penaliti cya James Milner cyahesheje intsinzi Liverpool y'ibitego 2-0 mu mukino wayihuzaga na Cardiff

James Milner, umukinnyi wo hagati mu kibuga wa Liverpool, avuga ko azafana Manchester United mu mukino uzaba ejo ku wa gatatu uzayihuza na Manchester City, ariko ko atazaba ari kureba uwo mukino.

City irushwa amanota abiri na Liverpool ndetse niramuka itsinze uwo mukino uzabera ku kibuga Old Trafford cya Manchester United, izahita ijya ku mwanya wa mbere muri iyi shampiyona ya Premier League yo mu Bwongereza.

Milner yagize ati: "Buzaba ari ubwa mbere mu buzima bwanjye".

"Ariko ntabwo nzaba ndikureba uwo mukino. Byaba ari nko gutakaza imbaraga zanjye ukuntu, nifuza ko umupira winjira mu rindi zamu. Ntabwo nzi icyo nzaba ndigukora, wenda nzaba nasohotse ndi nko kurya ahantu".

Liverpool iri guhatanira igikombe cya shampiyona ku nshuro ya mbere guhera mu mwaka w'imikino wa 1989-1990. Ifite amanota 88 mu mikino 35 imaze gukina, mu gihe City y'umutoza Pep Guardiola yo ifite amanota 86 mu mikino 34 imaze gukina.

Liverpool imaze gutsindwa umukino umwe gusa muri uyu mwaka w'imikino - ubwo yatsindwaga na City ibitego 2-1 ku kibuga Etihad cya City mu kwezi kwa mbere.

Ariko City, imaze gutsinda imikino 10 ya shampiyona yikurikiranya, izahita yegukana igikombe cy'uyu mwaka niramuka itsinze imikino yayo ine isigaje gukina muri shampiyona y'uyu mwaka.

Milner, watsindiye igikombe cya shampiyona inshuro ebyiri mu myaka itanu yakiniye City, yongeyeho ati: "Ni ibintu bibabaje kuba twaratsinzwe umukino umwe mu mwaka wose, none ibyo bikaba bishobora kuba bidahagije [ngo dutware igikombe]".

"Ducyeneye gutsinda imikino yacu isigaye. Nitubikora ubundi ntibibe bihagije, nta kundi ni ukuzamura amaboko tukavuga tuti 'wakoze neza City'".

"Ni ikipe yo ku rwego rwo hejuru, barabikoze mbere kandi bari no kubiharanira ubu. Icyo twe dushobora gukora ni ugutsinda imikino yacu isigaye hanyuma tukabotsa igitutu".