Pep Guardiola asaba ikipe ye gutuza nyuma yo gutsinda Manchester United

Pep Guardiola Uwufise ububasha kw’isanamu PA

Umutoza Pep Guardiola wa Manchester City avuga ko abakinnyi be bagomba gutuza - nubwo baraye batsinze umukino n'ikipe mucyeba ya Manchester United - niba bashaka kwisubiza igikombe cya shampiyona no muri uyu mwaka w'imikino.

Ibitego bya Bernardo Silva na Leroy Sane byatumye Manchester City itsinda Manchester United ibitego 2-0 ica kuri Liverpool, igera ku mwanya wa mbere ku rutonde rw'agateganyo rwa shampiyona.

Manchester City izatsindira igikombe cya shampiyona cy'uyu mwaka nishobora gutsinda imikino yayo itatu isigaje.

Umutoza Guardiola wa Manchester City - irusha inota rimwe Liverpool - yagize ati: "Ntabwo twari twatsindira igikombe mu gihe tugifite imikino itatu".

"Nabwiye abakinnyi nti 'ntimuzasome [ibitabo...] ejo [uyu munsi ku wa kane], ntimuzarebe televiziyo, muzasinzire cyane gusa muruhuke, nuko muhatane na Burnley [ku cyumweru]".

"Tuzajya gukinira kwa Burnley kandi turabizi ukuntu bizaba bigoye. Ni ingenzi gutuza".

Uwufise ububasha kw’isanamu Reuters
Image caption Manchester City ifite amanota 89 mu mikino 35 ya Premier League imaze gukina, mu gihe Liverpool ifite amanota 88

Mu mwaka ushize w'imikino wa 2017-2018, Manchester City yagejeje ku manota 100, yegukana igikombe cya shampiyona irusha amanota 19 Manchester United - kiba igikombe cya mbere cya Premier League Guardiola atwaye.

Iyi kipe yagira amanota 98 ikongera kugitwara uyu mwaka niramuka itsinze Burnley, Leicester na Brighton mu mikino itatu isigaje gukina muri uyu mwaka w'imikino.

Liverpool yo izakina na Huddersfield, Newcastle na Wolves, ariko izacyenera ko Manchester City itakaza amanota kugira ngo iyi Liverpool ibe yashobora gutsindira iki gikombe cya shampiyona bwa mbere guhera mu mwaka w'imikino wa 1989-1990.

Guardiola yagize ati: "Amakipe yombi [Manchester City na Liverpool] akwiye igikombe, ariko imwe yonyine ni yo ishobora kugitwara".

"Ikipe itazatwara igikombe ntabwo ishobora kwicuza kuko yitanze bishoboka byose".