Papy Faty wakinnye i Burundi no mu Rwanda yaguye mu kibuga arapfa

Papy Faty muri mu 2013 agikina muri Afrikca y'epfo Uwufise ububasha kw’isanamu Getty Images
Image caption Abazi Papy Faty bavuga ku mbuga nkoranyambaga ko bakeka ko uburwayi bw'umutima aribwo yazize uyu munsi

Umukinnyi w'umupira w'amaguru Papy Faty wakiniye ikipe y'igihugu y'u Burundi - Intamba mu Rugamba - yaguye mu kibuga aho yakinaga muri eSwatini ahita apfa. Birakekwa ko yazize umutima.

Uwahoze ari Kapiteni w'ikipe y'igihugu y'u Burundi yemereye umunyamakuru wa BBC ko mugenzi we Papy Faty koko yitabye Imana bitunguranye.

Uyu mukinnyi w'imyaka 28 yamenyekaniye mu ikipe ya Inter Star i Burundi, yayivuyemo mu 2008 ajya mu ikipe ya Trabzonspor muri Turkiya ariko ntiyahatinda aza kugaruka muri Africa.

Ikibazo cy'umutima

Yakinnye mu Rwanda muri APR FC (2011 - 2012) aho ngo yajyaga agira uburwayi bw'umutima.

Mu mpera z'umwaka ushize ikipe ya Real Kings FC y'i Durban muri Africa y'Epfo yahagaritse amasezerano ya Papy Faty kubera uburwayi bw'umutima ngo abanze ajye kwivuza.

Mu kwezi kwa kabiri Papy Faty nibwo yabonetse mu kibuga akinira ikipe ya Malanti Chiefs muri eSwatini.

Icyo gihe yabwiye ikinyamakuru KickOff.com cyandika ku mupira w'amaguru ko atagiye kubagwa umutima ahubwo yahisemo kwivuza imiti ya gakondo.

Abazi Papy Faty bavuga ku mbuga nkoranyambaga ko bakeka ko ubu burwayi aribwo yazize uyu munsi.

Faty, umukinnyi w'imyaka 28, yari afite amasezerano y'amezi atandatu y'igerageza mu ikipe ya Malanti.

Uwufise ububasha kw’isanamu Gallo Images
Image caption Faty yakiniye ikipe y'igihugu cye Intamba mu Rugamba imikino igera kuri 21 kuva mu 2008

Papy Faty yavuye muri APR FC ajya mu ikipe ya Bidvest muri Africa y'epfo, ubu yakinaga mu ikipe ya Malanti Chiefs mu gihugu cya eSwatini.

Amakuru arambuye ku buryo yapfuyemo n'icyo yazize ntabwo aratangazwa.

Faty yakiniye ikipe y'igihugu cye Intamba mu Rugamba imikino igera kuri 21 kuva mu 2008.

Urupfu rwe rwibukije abakunzi b'umupira w'amaguru urwa Marc-Vivien Foé (2003), Cheick Tioté (2017) n'abandi bakinnyi baguye mu kibuga cy'umupira bagapfa.