Neymar, watutse abasifuzi, yahanishijwe na Uefa kudakina imikino itatu

Neymar Uwufise ububasha kw’isanamu Getty Images

Rutahizamu Neymar w'ikipe ya Paris St-Germain (PSG) yahanishijwe n'impuzamashyirahamwe y'umupira w'amaguru ku mugabane w'Uburayi, Uefa, kudakina imikino itatu yo ku mugabane w'Uburayi kubera gukoresha urubuga nkoranyambaga rwa Instagram agatuka abasifuzi.

Hari nyuma yaho ikipe ye ya PSG isezerewe na Manchester United mu mikino ya kimwe cy'umunani cy'irushanwa rya Champions League ry'uyu mwaka mu mukino wo kwishyura wabereye i Paris mu murwa mukuru w'Ubufaransa mu kwezi gushize kwa gatatu.

Icyo gihe, uyu Munyabrezili yavuze ko icyemezo cyo gutanga penaliti mu minota ya nyuma y'uwo mukino cyafashwe n'umusifuzi Damir Skomina abanje kureba uburyo bwa videwo yunganira abasifuzi "giteye isoni".

Neymar wari uri mu mvune, yarebye uwo mukino Manchester United yigaranzuyemo PSG yari yayitsinze ibitego 2-0 mu mukino ubanza, ari mu gice cy'abafana.

Uwufise ububasha kw’isanamu Getty Images
Image caption Neymar wari mu mvune, yarebye umukino wo kwishyura wa PSG na Manchester United ari mu gice cy'abafana

Iki cyemezo cya Uefa kivuze ko ubu Neymar atazakina imikino ingana na kimwe cya kabiri cy'imikino yo mu matsinda ya Champions League mu mwaka utaha w'imikino.

Neymar yavuze ko iyo penaliti yinjijwe na Marcus Rashford "itabaho".

Nuko uyu rutahizamu wa PSG w'imyaka 27 y'amavuko akomeza agira ati: "Biteye isoni. Abantu bane batazi ikintu na kimwe ku mupira w'amaguru bongera kureba videwo igenda gahoro imbere ya televiziyo".

Umusifuzi yongeye gusuzuma videwo igaragaza umupira ukora ku kaboko ka myugariro Presnel Kimpembe wa PSG, mbere yuko afata icyemezo cyo guha Manchester United penaliti yo mu minota y'inyongera y'umukino yatumye itsinda PSG ibitego 3-1 ku itariki ya 6 y'ukwezi gushize kwa gatatu.

Iyo ntsinzi yatumye Manchester United ikomeza mu cyiciro gikurikiyeho hagendewe ku itegeko rijyanye n'ibitego byinshi yatsindiye hanze.

Ku cyumweru gishize, Neymar yasubiye mu kibuga nyuma yo kumara amezi atatu ari mu mvune, yinjira mu kibuga asimbura mu gice cya kabiri cy'umukino PSG yishimiyemo gutwara igikombe cya shampiyona ya Ligue 1 yo mu Bufaransa itsinze Monaco.

Ibindi bisa n’ibi