Igitego cya Messi cyatumye Barcelone yisubiza igikombe cya shampiyona ya Espanye

Lionel Messi Uwufise ububasha kw’isanamu Getty Images
Image caption Lionel Messi

Barcelone yaraye yegukanye igikombe cya 26 cya shampiyona ya La Liga yo muri Espanye ku ntsinzi y'igitego 1-0 cyinjijwe na rutahizamu Lionel Messi winjiye mu kibuga mu gice cya kabiri asimbura mu mukino wayihuzaga na Levante.

Ni umukino watangiye Messi ari ku ntebe y'abasimbura, mu gihe Barcelone yitegura umukino ubanza wa kimwe cya kabiri cy'irushanwa rya Champions League uzayihuza na Liverpool ku wa gatatu w'icyumweru gitaha.

Yinjije icyo gitego ku mupira yari ahawe n'umutwe na Arturo Vidal, acenga ba myugariro babiri ba Levante, nuko ahita anyeganyeza inshundura z'izamu rya Aitor Fernandez.

Ni umukino ariko utoroheye Barcelone kuko Levante yendaga kudobya ibyishimo byayo ubwo ku nshuro ebyiri mu gice cya kabiri yahushije uburyo bwo kwishyura icyo gitego.

Kimwe mu bikombe bitatu Barcelone iri guhatanira

Kibaye igikombe cya kane cya shampiyona Barcelone itsindiye mu myaka itanu ishize, kikaba n'icya 10 kuri Messi.

Nta gushidikanya ko kwisubiza iki gikombe kuri Barcelone, byongeye ikinira ku kibuga cyayo bwa mbere guhera mu mwaka wa 2010, ari igikorwa gikomeye yagezeho. Ibikombe bine biheruka yabitsindiye ku bindi bibuga cyangwa itigeze ikina.

Uwufise ububasha kw’isanamu Getty Images
Image caption Messi yinjije igitego cye cya 598 akinira Barcelone, ayifasha kwegukana igikombe cya shampiyona y'uyu mwaka

Yabigezeho mu gihe yari isigaje imikino itatu ya shampiyona, ndetse bituma igabanya intera y'ibikombe iri hagati yayo na Real Madrid ifite umuhigo w'ibikombe 33 bya shampiyona, kuri ubu ikinyuranyo kiri hagati y'aya makipe kikaba ari ibikombe birindwi.

Ariko ubu Barcelone igiye gushishikazwa no guhatanira gutwara ibikombe bitatu - birimo Champions League na Copa del Rey - muri uyu mwaka w'imikino.

Barcelone ntirongera kugera ku mukino wa nyuma wa Champions League guhera mu mwaka wa 2015, muri uwo mwaka ikaba ari nabwo iheruka kwegukana ibikombe bitatu.

Kuri ubu, Barcelone ikaba igiye kwita ku mukino ubanza wa kimwe cya kabiri cya Champions League uzayihuza na Liverpool ku itariki ya mbere y'ukwezi gutaha kwa gatanu, ku kibuga Nou Camp cya Barcelone.

Izakina kandi na Valencia ku wa gatandatu ku itariki ya 25 y'uko kwezi kwa gatanu, mu mukino wa nyuma w'igikombe cy'umwami cya Copa del Rey.

Ibindi bisa n’ibi