Umutoza wa Paris Saint-Germain yanenze Neymar washyamiranye n'umufana

Paris Saint-Germain yari yaratsindiye igikombe cy'Ubufaransa muri buri mwaka mu myaka ine ishize y'imikino Uwufise ububasha kw’isanamu AFP
Image caption Paris Saint-Germain yari yaratsindiye igikombe cy'Ubufaransa muri buri mwaka mu myaka ine ishize y'imikino

Umutoza Thomas Tuchel wa Paris Saint-Germain (PSG) yanenze Neymar ku guterana amagambo kwe n'umufana w'iyi kipe nyuma yaho itsindiwe mu gikombe cy'Ubufaransa n'ikipe ya Rennes ku wa gatandatu w'icyumweru gishize.

PSG yari yabanje gutsinda ibitego 2-0, yaje kwigaranzurwa na Rennes amakipe yombi anganya ibitego 2-2, ndetse Rennes iza kuyitsindira kuri penaliti 6-5.

Nyuma y'uwo mukino, Neymar yasunitse umufana wa PSG wari uri gufata videwo y'abakinnyi ba PSG akoresheje telefone ye igendanwa, ubwo aba bakinnyi batambukaga bajya gufata imidari yabo.

Umutoza Tuchel yagize ati: "Ntabwo ushobora kurwana n'umufana. Ntabwo ushobora gukora ibyo rwose".

"Ntibiba byoroshye kuzamuka amadarage nyuma yo gutsindwa. Ni ibintu bigoye cyane kuri jye, kuri buri wese - ariko tugomba kubyakira. Niba dutsinzwe, tugomba kugaragaza kubaha abandi".

Mu butumwa yatangaje ku rubuga nkoranyambaga rwa Instagram, Neymar w'imyaka 27 y'amavuko yagize ati: "Nitwaye nabi? Yego. Ariko nta n'umwe ushobora kubirebera gutyo gusa".

Uko gutsindwa na Rennes kwasoje imyaka ine PSG yari imaze itsindira icyo gikombe yikurikiranya.

Aherutse guhanwa na Uefa

Iyo ntsinzwi ivuze kandi ko nubwo PSG yongeye gutsindira igikombe cya shampiyona y'Ubufaransa, nta gikombe na kimwe mu yandi marushanwa yitabiriye muri uyu mwaka w'imikino yabashije gutsindira, inasezererwa na Manchester United muri kimwe cy'umunani cya Champions League.

Uwo mukino wahuje PSG na Rennes wari uwa mbere Neymar abanjemo mu kibuga guhera mu kwezi kwa mbere uyu mwaka, nyuma yo kuva mu mvune ikomeye yo ku kirenge agakina umukino wo mu cyumweru gishize wa shampiyona ya Ligue 1 ikipe ye itsinda Monaco.

Ariko ubu agiye gutegereza ngo arebe niba hari ibihano ubuyobozi bw'umupira w'amaguru mu Bufaransa bumufatira.

Ku wa gatanu w'icyumweru gishize, impuzamashyirahamwe y'umupira w'amaguru ku mugabane w'Uburayi, Uefa, yahannye Neymar.

Yahanishijwe kutazakina imikino itatu yo mu matsinda y'irushanwa rya Champions League ry'umwaka utaha, kubera gutuka abasifuzi bayoboye umukino wo kwishyura PSG yatsinzwemo ibitego 3-1 na Manchester United.

Bivuze ko atazakina imikino itatu muri itandatu yo mu matsinda ya Champions League mu mwaka utaha w'imikino wa 2019-2020.

Ibindi bisa n’ibi