Jurgen Klopp avuga ko Liverpool iza 'kuhababarira' ikina na Barcelone muri Champions League

Jurgen Klopp Uwufise ububasha kw’isanamu PA

Umutoza Jurgen Klopp wa Liverpool avuga ko ikipe iye iza "kuhababarira" ikina na Barcelone mu ijoro ryo kuri uyu wa gatatu, ariko ko iza no kuba ifite amahirwe muri uyu mukino ubanza wa kimwe cya kabiri cy'irushanwa rya Champions League.

Liverpool iraza kuba ikinira na Barcelone ku kibuga cya Barcelone cya Nou Camp.

Uyu Mudage utoza Liverpool yagize ati: "Turaza kuba turi nta makemwa? Ibyo ntibishoboka. Turaza gukora amakosa? Yego rwose. Turaza kuhababarira? Yego rwose, 100 ku ijana (100%)".

"Haraza kuba ibihe tuza kubona amahirwe? Yego, 100 ku ijana (100%). Nizeye ko tuza kuyabyaza umusaruro - ni byo dushaka kuza kugerageza gukora".

Umutoza Klopp, wagejeje Livepool ku mukino wa nyuma wa Champions League mu mwaka ushize w'imikino, yongeyeho ati: "Turi kumva dushobora kuba tumeze neza cyane byo gukina umukino wacu. Barcelone ni ikipe nziza".

"Umwaka ushize twahataniraga igikombe, ariko bo [Barcelone] bamaze imyaka hafi 20 bari mu bagihatanira. Biraza kuba bigoye cyane, ariko nta kindi gihe nigeze ngira amashyushyu nk'aya yo kubona akanya ko gukina [na Barcelone]".

"Nizeye ko abakinnyi banjye na bo baza kuba biyumva nk'uku niyumva".

Cyo kimwe na Liverpool, Barcelone imaze gutsindira ibikombe bitanu bya Champions League.

Ariko bine muri ibyo bikombe Barcelone yabitsindiye mu myaka 13 ishize, mu gihe igikombe kimwe gusa Liverpool iheruka gutsindira guhera mu mwaka wa 1984, yagitsindiye mu mwaka wa 2005.