Lionel Messi yinjije igitego cye cya 600 mu mukino wahuje Barcelone na Liverpool

Messi amaze gutsindira Barcelone ibitego 99 ari hanze y'urubuga rw'amahina Uwufise ububasha kw’isanamu Reuters
Image caption Messi amaze gutsindira Barcelone ibitego 99 ari hanze y'urubuga rw'amahina

Lionel Messi yaraye atsinze igitego cye cya 600 atsindiye Barcelone, yinjije ku mupira w'umuterekano mu mukino ubanza wa kimwe cya kabiri cya Champions League wabereye ku kibuga cyayo cya Nou Camp igatsinda Liverpool ibitego 3-0.

Uyu rutahizamu wa Barcelone n'uw'ikipe y'igihugu ya Argentine, yari yabanje no gutsinda ikindi gitego cye cya 599 muri uwo mukino, ku mupira yasubyaga mu izamu nyuma yaho mugenzi we Luis Suárez - wanatsinze igitego cya mbere mu gice cya mbere - yari yawuteye ku mutambiko w'izamu.

Nyuma yaho muri icyo gice cya kabiri, nibwo Messi yinjije icyo gitego cya 600 ku mupira yateye ari mu ntambwe zirenga gato 22 uvuye ku izamu, umupira uruhukira mu nshundura unyuze mu mfuruka y'izamu rya Liverpool ryari ririnzwe n'umunyezamu Alisson.

Umutoza Jurgen Klopp wa Liverpool yagarutse ku buhanga bwa Messi agira ati: "Nari nsanzwe mbizi ko Lionel Messi ari umukinnyi wo ku rwego rw'isi none ubu nongeye kubyibonera kandi sinatunguwe".

"Muri biriya bihe, ntagira gihagarika. Mbega ishoti".

Avuga ku gitego cye cya 600, Messi w'imyaka 31 y'amavuko yagize ati: "Byari byiza ubwo cyajyagamo, ariko nagize amahirwe yuko umupira winjiriye hariya hejuru mu mfuruka".

Igitego cya 600 ku itariki yatsinzeho icya mbere

Rio Ferdinand wahoze ari myugariro w'ikipe y'igihugu y'Ubwongereza yavuze ko yumva ari "umunyamugisha" kuba yashoboye kureba Messi yinjiza igitego cye cya 600 - ku itariki yatsinzeho icya mbere mu myaka 14 ishize.

Icyo gitego cya mbere yagitsinze ikipe ya Albacete muri shampiyona ya La Liga yo muri Espanye, hari ku itariki ya mbere y'ukwezi kwa gatanu mu mwaka wa 2005.

Ibitego 600 amaze gutsindira Barcelone, yabitsinze mu mikino 683, bivuze impuzandengo ya 0.9 by'igitego muri buri mukino. Umugwa mu ntege muri Barcelone ni Cesar Rodriguez, wayitsindiye ibitego 232, akaba yarakiniye Barcelone bwa nyuma mu mwaka wa 1954.

Mu gutsinda mu mukino na Liverpool, Messi ubu amaze gutsinda ibitego 26 byose hamwe amakipe atandatu yo muri shampiyona y'Ubwongereza ya Premier League amaze guhura nayo kugeza ubu muri Champions League.

Akaba ari undi mukinnyi umwe gusa umaze gutsinda amakipe atandatu atandukanye yo mu gihugu kimwe (nayo yo mu Bwongereza) nyuma ya mucyeba we w'igihe kirekire, Umunyaportugali Cristiano Ronaldo.

Ariko Messi akaba amurusha ibitego 14 ku byo we yatsinze amakipe yo mu Bwongereza.

Ibitego ubu amaze gutsinda muri Champions League bikaba ari 112, akaba ari uwa kabiri inyuma ya Cristiano ufite ibitego 126.