Naby Keita wa Liverpool agiye kumara amezi abiri adakina

Umukinnyi wo hagati wa Liverpool, Naby Keita, ubwo yahabwaga ubuvuzi bwihuse mu mukino wa Champions League ikipe ye yatsinzwe na Barcelone Uwufise ububasha kw’isanamu Reuters
Image caption Umukinnyi wo hagati wa Liverpool, Naby Keita, ubwo yahabwaga ubuvuzi bwihuse mu mukino wa Champions League ikipe ye yatsinzwe na Barcelone

Umukinnyi wo hagati w'ikipe ya Liverpool, Naby Keita, agiye kumara igihe cy'amezi abiri adakina nyuma yo kuvunika mu itako mu mukino wa Champions League wo ku wa gatatu w'iki cyumweru ikipe ye yatsinzwemo na Barcelone.

Uyu mukinnyi w'imyaka 24 y'amavuko ukomoka muri Guinea Conakry, ntabwo azongera kubasha gukina mu gihe gisigaye ngo uyu mwaka w'imikino urangire, ndetse hari impungenge niba azabasha gukina imikino y'igikombe cy'Afurika izatangira ku itariki ya 21 y'ukwa gatandatu mu Misiri.

Umutoza Jurgen Klopp wa Liverpool yavuze ko ari "amahirwe macye", ko uyu mukinnyi "yavunitse ku rwego rwo hejuru".

Klopp yongeyeho ati: "[Ni] inkuru mbi kuri twe no kuri we mu gihe imikino y'igikombe cy'Afurika iri hafi gutangira".

Keita byabaye ngombwa ko avanwa mu kibuga nyuma y'iminota 24 mu gice cya mbere cy'uwo mukino ubanza wabereye ku kibuga Nou Camp cya Barcelone, Liverpool yatsinzwemo ibitego 3-0.

Ntabwo azakina umukino wo kwishyura uzabera ku kibuga Anfield cya Liverpool ku itariki ya karindwi y'uku kwezi kwa gatanu, ndetse n'imikino ibiri ya shampiyona Liverpool isigaje gukina izayihuza na Newcastle United na Wolves.