Manchester United yananiwe kurangiza mu myanya ine ya mbere nyuma yo kunganya

Paul Pogba Uwufise ububasha kw’isanamu PA
Image caption Paul Pogba

Mu mwaka utaha w'imikino, Manchester United izaba irambirije ku kwitabira irushanwa rya Europa League nyuma yaho inganyirije na Huddersfield - iyi mu kwezi kwa gatatu yamanutse mu cyiciro cya kabiri ikaba ari icyo izaba ikinamo mu mwaka utaha w'imikino.

Huddersfield yari yarashoboye kubona amanota ane mu mikino 23 yabanje.

Ariko muri uwo mukino wanarebwaga na Dean Hoyle, umuyobozi mukuru w'iyi kipe ucyuye igihe, iyi kipe yashoboye kubona igitego cyo kunganya cyatsinzwe na Isaac Mbenza cyari n'icya mbere ayitsindiye.

Scott McTominay wa Manchester United ni we wari wafunguye amazamu mu gice cya mbere cy'umukino.

Bivuze ko Manchester United ubu imaze gukina imikino itanu itayitsinda, uru rukaba ari rwo rukurikirane rw'imikino rubi cyane igize kuva yamara imikino umunani idatsinda ku bw'umutoza Louis van Gaal hagati y'ukwezi kwa cumi na kumwe n'ukwa cumi na kabiri mu mwaka wa 2015.

Kunganya muri uwo mukino bivuze ko umutoza Ole Gunnar Solskjaer adashobora gushyikira Chelsea cyangwa Tottenham, kandi akaba afite gusa amahirwe agerwa ku rushyi yo kuba yarangiza shampiyona ari ku mwanya wa gatanu ari imbere ya Arsenal.

Uwufise ububasha kw’isanamu Reuters
Image caption Alexis Sanchez amaze gutsinda igitego kimwe muri Premier League muri uyu mwaka w'imikino

Hari impungenge zikomeye kandi ko Alexis Sanchez ashobora kudakina mu mukino wayo wa nyuma wa shampiyona uzayihuza na Cardiff ku kibuga Old Trafford cya Manchester United, nyuma yo kuvunika mu ntangiriro y'igice cya kabiri cy'uwo mukino.

Huddersfield ni iya nyuma ku rutonde rw'agateganyo rw'iyi shampiyona ya Premier League, ikaba izarangiza shampiyona y'uyu mwaka ikina na Southampton ku cyumweru. Manchester United iri ku mwanya wa gatandatu.