Klopp wa Liverpool ati 'Birarenze', Valverde wa Barcelona na we ati 'Badusyonyoye'

Liverpool Uwufise ububasha kw’isanamu Getty Images

Jurgen Klopp utoza Liverpool nyuma yo gusezerera FC Barcelona yabanje kubura icyo avuga, ariko nyuma avuga ko yarenzwe n'ibyishimo kubera ibyo abakinnyi be bakoze, mu gihe mugenzi we wa Barcelona avuga ko Liverpool "yabasyonyoye".

Liverpool yageze ku mukino wa nyuma w'igikombe cy'amakipe yabaye aya mbere iwayo ku mugabane w'Uburayi itsinze ibitego 4 - 0 bwa Barcelona yishyuye 3 - 0 yari yatsinzwe ubushize ndetse irenzaho.

Georginio Wijnaldum na Divock Origi ni bo bagabanye ibi bitego ku kibuga Anfield cya Liverpool. Liverpool itegereje itsinda hagati ya Ajax na Tottenham, ikazakina na yo ku mukino wa nyuma ku kibuga Wanda Metropolitano i Madrid ku itariki ya mbere y'ukwezi gutaha kwa gatandatu.

Nyuma y'umukino, umutoza Jurgen Klopp yagize ati: "Wabyumvaga ku isi hose ko bavuga ko gutsinda uyu mukino kuri twe urebye bidashoboka. Noneho gutsinda nta gitego twinjijwe nanjye sinzi uko abahungu babigenje".

Klopp yavuze ko guhuza impano hamwe n'umutima ukomeye byabaye mu ijoro ry'ejo ku wa kabiri atigeze abibona mbere. Yagize ati: "Dushobora kutazongera kubona umukino nk'uyu".

Kuva ku bitego bitatu watsinzwe ukigaranzura ukanatsinda muri kimwe cya kabiri cy'iri rushanwa rya Champions League byaherukaga kuba mu mwaka wa 1986 ari Barcelona ibikoze ku ikipe ya Gothenburg.

Klopp ati: "Imbere y'umukino nabwiye abahungu nti sintekereza ko bishoboka ariko kubera ko ari mwe ndumva dufite amahirwe. Bagiye bakora ibitangaje. Ibyishimo birarenze".

Uwufise ububasha kw’isanamu EPA
Image caption Umutoza Jurgen Klopp wa Liverpool

Uyu mutoza yatwaye ibikombe bibiri bya shampiyona mu Budage atoza Borussia Dortmund, ariko kuva mu mwaka wa 2012 amaze gutsindwa inshuro ebyiri ku mukino wa nyuma wa Champions League.

Ati: "Ibyo abantu bavuga ko mpora ntsindwa kuri uyu mukino wa nyuma ndabizi, kandi bafite ishingiro. Ubu mwabonye amarira [y'ibyishimo] yari mu maso y'abakinnyi, kuri iyi nshuro bwo ntabwo bisanzwe".

'Twakinnye nk'abiga' - Suarez

Nyuma y'uyu mukino, umutoza Ernesto Valverde yabwiye abanyamakuru ko ibitego bibiri bya mbere batsinzwe byihuse bigaha intege Liverpool.

Uwufise ububasha kw’isanamu Getty Images
Image caption Uku gutsindwa kwa Barcelona kuvuze ko umukino wa nyuma wa Champions w'uyu mwaka ari wo wa mbere uzaba ubayeho utarimo Messi cyangwa Cristiano Ronaldo wa Juventus guhera mu mwaka wa 2013

Ati: "Rwose badusyonyoye, bari bakomeye cyane, bakinnye neza cyane, ndagira ngo mbashimire umukino wabo iri joro [ku wa kabiri]. Naho kuri twe n'abafana bacu ni ibintu bibabaje cyane".

Valverde yavuze ko nk'umutoza - nubwo atazi ikigiye kumubaho - ariko ibi ari we bibazwa.

Luis Suarez rutahizamu wa Barcelona wari wagarutse ku kibuga Anfield yakiniyeho igihe mu ikipe ya Liverpool, yavuze ko bakwiye "kwitegura imvura" y'ibinegu igiye kubanyagira.

Ati: "Turababaye cyane. Turi mu gahinda gakomeye".

Muri uwo mukino, Suarez wazomerwaga cyane n'abafana ba Liverpool, yakomeje ati: "Igihe badutsinze igitego cya kane twabaye nk'abana biga".

Uwufise ububasha kw’isanamu Getty Images
Image caption Umutoza Valverde wa Barcelona avuga ko ikipe ya Liverpool yabarushije bidasubirwaho

Barcelona ubu yamaze kwegukana igikombe cya shampiyona muri Espanye, ariko kuva mu mwaka wa 2015 ntabwo irabasha kugera ku mukino wa nyuma w'irushanwa ry'amakipe yabaye aya mbere i Burayi.

Ifirimbi ya nyuma y'umukino waraye ubaye yateje ibyishimo bidasanzwe mu kibuga no mu bafana bagize uruhare runini mu gushyigikira Liverpool baririmba ko "nta na rimwe izagenda yonyine".

Uku kwigaranzura indi kipe mu buryo budasanzwe kwa Liverpool kwibukije abakunzi b'umupira uko iyi kipe yabigenje nanone ku mukino wa nyuma w'iri rushanwa mu mwaka wa 2005 imbere ya AC Milan.

Ku cyumweru, Liverpool ifite amahirwe - nubwo hari abemeza ko ari macye - yo kwegukana igikombe cya shampiyona y'ubwongereza mu gihe yabasha gutsinda ikipe ya Wolves ariko bigasaba ko Manchester City yaba yatsinzwe cyangwa ikanganya na Brighton.