Antoine Griezmann arava muri Atletico. Arajya muri Barça?

Byakomeje kuvugwa cyane ko Antoine Griezmann ashobora kwerekeza muri Barcelone Uwufise ububasha kw’isanamu Getty Images
Image caption Byakomeje kuvugwa cyane ko Antoine Griezmann ashobora kwerekeza muri Barcelone

Antoine Griezmann, rutahizamu wa Atletico Madrid, yatangaje ko azava muri iyi kipe uyu mwaka w'imikino urangiye, akaba yari ayimazemo imyaka itanu.

Nubwo yashyize umukono ku masezerano y'imyaka itanu mu kwezi kwa gatandatu mu mwaka ushize, umukino azakina kuwa gatandatu bakina na Levante uzaba ari wo wa nyuma we muri Atletico.

BBC yamenye amakuru ko Barcelone ari yo igiye kugura amasezerano ya miliyoni 120 z'amayero y'uyu mukinnyi.

Griezmann w'imyaka 28 y'amavuko, yashimiye iyi kipe ku myaka itanu avuga ko yabaye iy'ibyishimo, ashimira abafana urukundo bamweretse, ndetse avuga ko kugenda bitari byoroshye.

Muri videwo yashyize ku rubuga nkoranyambaga rwa Twitter, yagize ati: "Nafashe icyemezo cyo kugenda, nkareba ibindi, ngatera indi ntambwe".

Uyu Mufaransa yatsindiye Atletico ibitego 133 mu mikino 256 yayikiniye kuva yayigeramo mu mwaka wa 2014 avuye muri Real Sociedad.

Yafashije kandi iyi kipe gutwara ibikombe nka Europa League na Super Cup yo muri Espanye, ndetse buri mwaka mu myaka itanu ishize ni we wabaye umukinnyi watsinze ibitego byinshi kurusha abandi muri iyi kipe.

Nkuko yabitangaje mu cyegeranyo cy'amashusho kitwa "The Decision", umwaka ushize Griezmann yanze ubusabe bwa Barcelone yamushakaga.

Mu kwezi kwa cumi na kabiri k'umwaka wa 2017, Atletico yareze FC Barcelone mu ishyirahamwe ry'umupira w'amaguru ku isi, FIFA, ku cyo yavugaga ko ari ukuvugana n'umukinnyi wayo mu buryo bunyuranyije n'amategeko.

Griezmann abaye umukinnyi wa gatatu ukomeye ugiye kuva muri Atletico nyuma ya myugariro Lucas Hernandez uzajya muri Bayern Munich na kapiteni wayo w'igihe kirekire Diego Godin uzagenda amasezerano ye narangira.

Isesengura: Griezmann arabisikana na Coutinho?

David Ornstein, umunyamakuru w'imikino wa BBC, abona ko kujya muri Barça gushoboka cyane kwa Griezmann gushyira mu kibazo umwanya wa Philippe Coutinho ku kibuga Nou Camp.

Coutinho ntiyatanze umusaruro yari yitezweho kuva yava muri Liverpool mu kwa mbere kwa 2018 aguzwe miliyoni 142 z'amapawundi, Ornstein akavuga ko hari abamuhaye amakuru ko kuza kwa Griezmann ari ko kugenda k'uyu Munyabrezili.

Nubwo hari abanuganuga no kugenda kwa Luis Suarez, ariko uyu ngo yatanze umusaruro kurusha Coutinho bityo we afite amahirwe yo kugumana na Barcelone nibura undi mwaka umwe.

David Ornstein avuga ko hari amakuru ko Coutinho nava muri Barça ashobora kwerekeza muri Chelsea agasimbura Eden Hazard mu gihe uyu yaba agiye muri Real Madrid iri kumushaka.

Ariko icyizere cya Chelsea icyo ari cyo cyose cyo kugura abakinnyi, kizashingira ku bizava mu bujurire bwayo ku kwangirwa kugura abakinnyi, yagejeje ku rukiko nkemurampaka mu mikino.

Ibindi bisa n’ibi