Saido Berahino yahaniwe gutwara imodoka yarengeje urugero rw'inzoga

Saido Berahino ategerejwe n'ikipe y'igihugu cye Intamba mu Rugamba mu mikino y'igikombe cya Africa mu kwa kwa gatandatu mu Misiri Uwufise ububasha kw’isanamu Getty Images
Image caption Saido Berahino ategerejwe n'ikipe y'igihugu cye Intamba mu Rugamba mu mikino y'igikombe cya Africa mu kwa kwa gatandatu mu Misiri

Uyu rutahizamu w'umurundi ukinira ikipe ya Stock City yari yarengeje hafi inshuro eshatu ikigero ntarengwa cy'inzoga ubwo yafatwaga atwaye imodoka ye ya Range Rover tariki 18 z'ukwezi kwa kabiri.

Umucamanza mu rukiko rw'i London yategetse ko kubera uburyo yari yasinze bikabije atwaye amuhanishije amande y'amapawundi 75 000 ndetse abujijwe gutwara imodoka mu gihe cy'amezi 30.

Nubwo umucamanza yemeje ko icyo gihe atwaye yasinze yari yanibwe n'abajura ariko ngo ntibibujije ko atari akwiriye gutwara imodoka yaborewe bigeze aho.

Urukiko ruvuga ko rwabonye amakuru ko uyu musore w'imyaka 25 yigeze gufatwa atwaye nanone yasinze mu 2015 no mu 2012.

Mu kwezi kwa kabiri k'uyu mwaka ubwo yahagarikwaga nabwo ngo yari atwaye imodoka yaborewe.

Bamupimye basanze miligarama 103 z'inzoga muri mililitiro 100 z'umwuka. Igipimo ntarengwa muri iki gihugu ni miligarama 35.

Mu rukiko, Berahino we yabwiye polisi ko yatwaye imodoka ahunga abajura bari bitwaje intwaro kuko banamwibye isaha ye n'imikufi ibiri ya diyama.

Urukiko ruvuga ko Berahino ubu nta kintu kimuha imibereho afite kuko ikipe ye ya Stoke City yamuhagaritse ikaba itamuhemba, mu gihe akenera gukoresha amapawundi 20 000 ku kwezi.

Uyu musore wavukiye i Burundi ategerejwe n'ikipe y'igihugu cye Intamba mu Rugamba igiye kwitegura imikino y'igikombe cya Africa kizaba mu kwezi gutaha kwa gatandatu mu Misiri.

Ibindi bisa n’ibi