PSG ivuga ko Kylian Mbappe azayigumamo umwaka utaha

Kylian Mbappe Uwufise ububasha kw’isanamu Getty Images

Ikipe ya Paris St-Germain (PSG) yatangaje ko rutahizamu Kylian Mbappe azagumana nayo no mu mwaka utaha w'imikino.

Hamwe na PSG, uyu mwaka yatwaye igikombe cya shampiyona, no ku cyumweru ahabwa igihembo cy'umukinnyi warushije abandi muri shampiyona y'Ubufaransa bita Ligue 1.

Kuri uwo munsi, mu ijambo rye yakomoje ku kugenda avuga ko hari "umushinga mushya ahandi".

Asabwe gusobanura icyo yashakaga kuvuga, uyu musore w'imyaka 20 y'amavuko yavuze ko "yavuze icyo yagombaga kuvuga".

PSG yasohoye itangazo kuri uyu wa mbere ivuga ko "hari byinshi bihuza iyi kipe na Mbappe". Ko n'umwaka utaha w'imikino azaba ari muri iyi kipe.

Uwufise ububasha kw’isanamu Getty Images
Image caption Uyu mwaka Mbappe yegukanye igihembo cy'umukinnyi wahize abandi muri shampiyona y'umupira w'amaguru y'icyiciro cya mbere mu Bufaransa ya Ligue 1

Mbappe yaje muri PSG mu mwaka wa 2017 avuye muri AS Monaco.

Yabanje kuza atijwe, nyuma iyi kipe yemera kumugura kuri miliyoni zirenga 166 z'amapawundi, aba umukinnyi wa kabiri uhenze mu mateka inyuma ya Neymar na we bakinana.

Ubu amaze gutsindira PSG ibitego 59 mu mikino 86, ayifasha gutwara ibikombe bibiri bya shampiyona na kimwe cy'Ubufaransa, gusa imikino y'amakipe yabaye aya mbere iwayo yo ntiramuhira we na PSG.

Muri shampiyona irangiye, Mbappe ni we watsinze ibitego byinshi mu Bufaransa - ibitego 32.

Ibindi bisa n’ibi