Nyuma yo kwisubiraho, Asamoah Gyan yahise ahamagarwa mu ikipe y'igihugu ya Ghana

Rutahizamu wa Ghana Asamoah Gyan amaze gukina mu marushanwa atandatu y'igikombe cy'Afurika cy'ibihugu Uwufise ububasha kw’isanamu Getty Images
Image caption Rutahizamu wa Ghana Asamoah Gyan amaze gukina mu marushanwa atandatu y'igikombe cy'Afurika cy'ibihugu

Asamoah Gyan yahamagawe mu bakinnyi b'agateganyo b'ikipe y'igihugu ya Ghana igiye kwitegura igikombe cy'Afurika kizaba mu kwezi gutaha mu Misiri.

Ku wa mbere w'iki cyumweru, uyu mukinnyi yari yatangaje ko asezeye mu ikipe y'igihugu Black Stars, nuko bucyeye bwaho arabihindura avuga ko Perezida wa Ghana yamusabye kwisubiraho.

Uyu rutahizamu w'imyaka 33 y'amavuko umaze gutsindira Ghana ibitego byinshi kurusha abandi, yabanje gusezera ikipe y'igihugu nyuma yo kwamburwa kuba kapiteni wayo.

Kugeza ubu, Kwasi Appiah utoza iyi kipe ntaratangaza uzaba ari kapiteni w'iyi kipe mu Misiri.

Kuva mu kwezi kwa cyenda mu mwaka wa 2017, Gyan ntabwo yagaragaye mu ikipe y'igihugu cye kubera imvune, ndetse no mu ikipe ya Kayserispor akinamo muri Turukiya biramugora kubona umwanya.

Ubu yatangaje ko agifite ubushake bukomeye bwo gufasha ikipe y'igihugu mu gikombe cy'isi kandi "agishishikariye gukorera igihugu n'abaturage ba Ghana".

Mu bakinnyi 29 b'ikipe ya Black Stars bahamagawe, batatu gusa ni bo bakina mu makipe yo muri Ghana.

Abatahamagawe mu buryo butunguranye ni Harrison Afful ukina mu ikipe ya Columbus Crew muri Amerika na Richmond Yiadom ukina muri Red Star Belgrade muri Serbia.

Ku itariki ya mbere y'ukwezi gutaha, biteganyijwe ko iyi kipe izajya mu myiteguro y'irushanwa izakorera i Dubai.

Ghana ifite ibikombe bine bya Afurika, iheruka gutwara iki gikombe mu 1982. Mu mwaka wa 2015 ni bwo iheruka kugera ku mukino wa nyuma w'iri rushanwa.

Ibindi bisa n’ibi