Lionel Messi avuga ko agitekereza ku gusezererwa na Liverpool

Lionel Messi (iburyo) yatsinze ibitego 36 afasha Barcelone kwegukana igikombe cya shampiyona ya Espanye - izwi nka La Liga - y'uyu mwaka Uwufise ububasha kw’isanamu Getty Images
Image caption Lionel Messi (iburyo) yatsinze ibitego 36 afasha Barcelone kwegukana igikombe cya shampiyona ya Espanye - izwi nka La Liga - y'uyu mwaka

Lionel Messi yavuze ko ashaka gufasha Barcelone gutsindira igikombe cy'umwami cya Copa del Rey mu rwego rwo kugabanya akababaro ko gutsindwa na Livepool mu irushanwa rya Champions League ry'uyu mwaka riri "mu bihe bibi cyane yagize mu mwuga we".

Ubwo yagiranaga ikiganiro n'abanyamakuru - cya mbere mu myaka ine yari ishize - ku munsi w'ejo ku wa gatanu, Messi w'imyaka 31 y'amavuko yavuze ko na n'ubu agitekereza ku gutsindwa na Liverpool muri kimwe cya kabiri cya Champions League ku itariki ya 7 y'uku kwezi kwa gatanu.

Icyo gihe Liverpool yatsinze Barcelone ibitego 4-0 mu mukino wo kwishyura wabereye ku kibuga Anfield cya Liverpool - mu gihe Barcelone yari yatsinze Liverpool ibitego 3-0 mu mukino ubanza, ihita iyisezerera.

Messi yagize ati: "[Intsinzwi] Yaradushegeshe".

"Gutsindira Copa del Rey bwaba ari bwo buryo bwiza cyane bushoboka bwo gusoza uyu mwaka w'imikino".

Barcelone yamaze gutsindira igikombe cya shampiyona y'uyu mwaka, yashobora gutwara ibikombe bibiri iramutse itsinze Valencia ku mukino wa nyuma wa Copa del Rey kuri uyu wa gatandatu.

Ariko Messi yaburiye ko gutsindwa uyu mukino byatuma Barcelone "ishegeshwa kurusha" uko biri ubu.

Yongeyeho ati: "Tugomba gusaba imbabazi z'ukuntu twakinnye mu gice cya kabiri kwa Liverpool, atari ukubera uko umukino warangiye, ahubwo kubera uko byagaragaye ko tutahatanye. Cyabaye kimwe mu bihe bibi cyane nagize mu mwuga wanjye".

Yava muri Barcelone?

Muri icyo kiganiro, Messi yashyigikiye umutoza Ernesto Valverde, avuga ko ibyabaye ari we n'abakinnyi bagenzi be bo kubibazwa, avuga ko ashaka ko uyu Valverde akomeza gutoza Barcelone.

Abajijwe niba ateganya kuva muri Barcelone, Messi yasubije ati: "Oya, oya, oya."

"Nagize ibibazo mu ikipe y'igihugu [ya Argentine] kandi ndacyashaka kugerageza kugira icyo nyitsindira. Gusezererwa muri Champions League ntabwo bituma ndekeraho gushaka kuba hano [muri Barcelone]".

Kuri uyu wa gatandatu, Messi ashobora gutsindira igikombe cye cya karindwi cya Copa del Rey, cyaba kibaye icya 21 mu bikombe bikomeye amaze gufasha Barcelone gutsindira.

Ibindi bisa n’ibi