Harry Kane yarakize, 'yiteguye gukina' umukino wa nyuma wa Champions League

Harry Kane amaze gutsinda ibitego bitanu muri Champions League y'uyu mwaka Uwufise ububasha kw’isanamu Reuters
Image caption Harry Kane amaze gutsinda ibitego bitanu muri Champions League y'uyu mwaka

Rutahizamu Harry Kane wa Tottenham avuga ko yiteguye gukina nyuma yo gukira imvune, mu gihe umukino wa nyuma wa Champions League uzayihuza na Liverpool ku wa gatandatu wegereje.

Kane w'imyaka 25 y'amavuko yari yagize "ikibazo gikomeye cy'imitsi yo mu ivi" rye ry'ibumoso ahagana ku kagombambari ubwo yanyereraga bakina na Manchester City ku itariki ya 9 y'ukwezi gushize kwa kane, mu mukino ubanza wa kimwe cya kane cy'iri rushanwa.

Ku ikubitiro, umutoza Mauricio Pochettino wa Tottenham yari yagize ubwoba ko Kane ashobora kutongera gukina muri uyu mwaka w'imikino.

Kane yagize ati: "Ndumva meze neza. Nta kibazo ndagira kugeza ubu".

Yongeyeho ati: "Natangiye kongera kumva meze neza mu ikipe mu mpera y'icyumweru gishize. Muri iki cyumweru noneho ni ukurushaho kumera neza bishoboka byose".

"Nyuma, umutoza ni we uzafata icyemezo. Azagenzura yemeze niba nakina cyangwa ntakina, ariko kugeza ubu, ndumva meze neza kandi niteguye".

Uwufise ububasha kw’isanamu Getty Images

Kane yatsindiye Tottenham ibitego 24 mu marushanwa yose muri uyu mwaka w'imikino, nubwo bwose yamaze ibyumweru bitandatu adakina mu kwezi kwa mbere n'ukwa kabiri kubera ikibazo cyo kwangirika kw'imitsi yo kuri iryo vi nubundi.

Abajijwe niba azakinisha Kane ku mukino wa nyuma w'iri rushanwa uzayihuza na Liverpool mu mujyi wa Madrid, Pochettino yagize ati: "Sinshobora guhamya ko ameze neza 100 ku ijana (100%), niba azaba yicaye ku ntebe y'abasimbura cyangwa atayicayeho, ariko twishimiye cyane uko ari kugenda amererwa".

Ibindi bisa n’ibi