Abacyeba b'i Londres barahatanira igikombe muri 4000Km uvuye iwabo

Ba rutahizamu Eden Hazard wa Chelsea (ibumoso) na Pierre-Emerick Aubameyang wa Arsenal Uwufise ububasha kw’isanamu Getty Images
Image caption Ba rutahizamu Eden Hazard wa Chelsea (ibumoso) na Pierre-Emerick Aubameyang wa Arsenal

Chelsea na Arsenal, amakipe ubu amaze kuba abacyeba mu mujyi wa Londres, uyu munsi arahurira ku mukino wa nyuma wa Europa League mu mujyi wa Baku muri Azerbaijan muri kilometero 4000 uvuye iwayo.

Hari amakuru yemeza ko batsinda batsindwa, uyu ari umukino wa nyuma ku mutoza Maurizio Sarri wa Chelsea, gusa we yirinze kugira icyo avuga ku makuru yemeza ko agiye kujya muri Juventus.

Uyu Mutaliyani w'imyaka 60 y'amavuko mu ntangiriro y'uyu mwaka yagowe no kubana neza no kumvikana n'abakinnyi bamwe na bamwe ba Chelsea, gusa ubu yemeza ko byahindutse abanye na bo neza kandi ko yishimye.

Sarri nta gikombe cyo muri uru rwego aratwara mu gihe mugenzi we wa Arsenal, Unai Emery, iki bagiye guhatanira yagitwaye gatatu atoza Séville FC hagati ya 2014 na 2016.

Intego ebyiri za Arsenal kuri uyu mukino wa nyuma

Mu gihe Chelsea yo yatwaye iki gikombe mu 2013 ndetse ikurikije icya Champions League cya 2014, Arsenal yo iheruka igikombe cy'i Burayi kitwaga European Cup yatwaye mu 1994.

Arsenal nitsinda uyu mukino irabona amahirwe yo kujya muri Champions League nyuma y'imyaka ibiri itahagera. Gusa igihangayitse cyane Arsenal ni ukubona igikombe nk'iki iheruka mu myaka 25 ishize.

Unai Emery yagize ati: "Intego ni ebyiri hano ariko iy'ibanze ni ugutwara igikombe, iya kabiri ni ukujya muri Champions League".

Chelsea yo izajya muri Champions League umwaka utaha kuko yarangije ari iya gatatu muri shampiyona, ariko iki gikombe nayo iragishaka cyane.

Uwufise ububasha kw’isanamu PA
Image caption Ikibuga cy'imikino Olympike cya Baku kimaze imyaka ine, ndetse cyakiniwemo imikino yo mu matsinda ya Champions League ndetse n'iyo gushakisha tike zo gukina igikombe cy'isi

Myugariro wayo David Luiz yagize ati: "Ni igikombe gikomeye, turagishaka cyane, turashaka gusubiramo amateka ya 2013".

N'Golo Kanté, umukinnyi ukomeye wo hagati wa Chelsea, ni we bitaramenyekana neza niba abasha gukina uyu munsi kubera imvune yagize mu ivi ku wa gatandatu. Umutoza we avuga ko idakabije, ariko bagisuzuma niba abasha gukina. Abandi idafite ni Ruben Loftus-Cheek na Callum Hudson-Odoi.

Arsenal yo ntabwo ifite Henrikh Mkhitaryan, umukinnyi wayo wo hagati wahisemo kudakina kubera ibibazo by'umutekano biri hagati y'igihugu cye cya Armenia n'igituranyi Azerbaijan bakiniramo none.

Emery arahitamo kandi niba akinisha umunyezamu Petr Cech - wahoze muri Chelsea - kuri uyu mukino we wa nyuma mbere yo guhagarika gukina.

Emery yavuze ko amakuru yemeza ko Cech umwaka utaha azaba umuyobozi w'imikino muri Chelsea, atari yo ari bushingireho afata umwanzuro wo kumukinisha cyangwa kumureka.

Gukinira i Baku ni ikibazo?

Madrid izakira Abongereza benshi cyane ku wa gatandatu ku mukino wa nyuma wa Champions League hagati ya Liverpool na Tottenham, ariko si ko bimeze kuri Baku uyu munsi.

Uwufise ububasha kw’isanamu Reuters
Image caption Bishoboka ko ku kibuga cya Baku - cyakira abantu ibihumbi 70 - haza kuba hari abafana ibihumbi bitanu ba Chelsea na Arsenal bose hamwe

Biravugwa ko abafana ba Chelsea na Arsenal bose hamwe batarenga 5000 ari bo bajya i Baku. Hari impamvu zitavugwaho rumwe zatumye benshi banga kujyayo.

Zimwe mu mpamvu zitangwa harimo indege nke cyane zijyayo zitabanje guca ahandi.

Henrikh Mkhitaryan wa Arsenal we yavuze ko atazajyayo kubera umutekano we uvuye ku makimbirane igihugu cye cya Armenia gifitanye na Azerbaijan, akavuga ko ubwoko bwe bwatuma yibasirwa.

Mu myaka micye ishize, Azerbaijan yabonye ko amahanga ayizi ho ibintu bibiri: amafaranga ava ku bikomoka kuri peteroli no kubangamira bikomeye uburenganzira bwa muntu.

Uwufise ububasha kw’isanamu Adam Davy
Image caption Henrikh Mkhitaryan avuga ko ashobora kwibasirwa aramutse akinnye muri uyu mukino wa nyuma

Iki gihugu kiyemeje guhindura iyi sura, ku burenganzira bwa muntu, giciye cyane cyane mu mikino.

Kimaze kwakira imikino imwe n'imwe nka 'Islamic Solidarity Games', Formula 1 Grand Prix, imikino ya mbere ya European Games ya 2015, ndetse cyari kifuje kwakira n'imikino Olympike ya 2016 na 2020.

Iki gihugu kandi cyahaye miliyoni 12 z'ama-Euro ikipe ya Atletico Madrid ngo ku mwambaro wayo handikweho "Azerbaijan - Land of Fire".

Imiryango iharanira uburenganzira bwa muntu ivuga ko uku kwakira amarushanwa akomeye kwa Azerbaijan ari uburyo ubutegetsi bw'iki gihugu buri gukoresha mu "kweza isura yabwo" no gukwepa ibyo bunengwa.

Igisubizo cya Uefa kuri Arsenal

Nyuma yaho Arsenal ibarije impamvu uyu mukino wa nyuma washyizwe kure uvuye mu Bwongereza, impuzamashyirahamwe y'umupira w'amaguru ku mugabane w'Uburayi, Uefa, yasubije ko yawushyize i Baku itazi ko uzakinwa n'amakipe yombi yo mu Bwongereza.

Uefa ivuga kandi ko kuba iki gihugu kiri kure ugereranyije n'Uburayi bwo mu burengerazuba, bidakwiye kukibuza kwakira amarushanwa akomeye.

Ariko Uefa ntacyo yavuze ku birego byo guhonyora uburenganzira bwa muntu iki gihugu gishinjwa. Kandi bisa nkaho bitari byitezwe ko ibivugaho, ushingiye ku kayabo gikomeje gushora mu mashyirahamwe atandukanye y'imikino.