Sergio Ramos avuga ko ashaka gusoreza umupira muri Real Madrid

Sergio Ramos yari afite imyaka 19 y'amavuko ubwo yageraga muri Real Madrid mu kwezi kwa munani muri 2005 avuye muri Sevilla, aguzwe miliyoni 18 n'ibihumbi 500 by'amapawundi Uwufise ububasha kw’isanamu Rex Features
Image caption Sergio Ramos yari afite imyaka 19 y'amavuko ubwo yageraga muri Real Madrid mu kwezi kwa munani muri 2005 avuye muri Sevilla, aguzwe miliyoni 18 n'ibihumbi 500 by'amapawundi

Kapiteni Sergio Ramos wa Real Madrid avuga ko ashaka gusoreza gukina umupira kwe muri iyi kipe nubwo hari ikipe yo mu Bushinwa yari yifuje ko yayikinira.

Ku wa gatatu w'iki cyumweru, Florentino Perez, Perezida wa Real Madrid, yavuze ko uyu myugariro wa Real n'uw'ikipe y'igihugu ya Espanye yari yasabye kuyivamo akajya gukina muri shampiyona y'Ubushinwa.

Ramos w'imyaka 33 y'amavuko yagize ati: "Ni ukuri ko hari ikipe yo mu Bushinwa yifuza ko nyikinira, ibyo sinabibeshyaho".

Ramos watangiye gukinira Real mu mwaka wa 2005 ndetse ufite kontaro izarangira mu mwaka wa 2021, yongeyeho ati: "Inzozi zanjye ni ugusoreza umupira w'amaguru wanjye hano".

Perez yavuze ko Ramos n'umuhagarariye mu byo kumushakira isoko bamubwiye ko babonye "ubusabe bwiza cyane" bw'ikipe batavuze mu izina yo mu Bushinwa, ariko ko iyo kipe itashoboraga kugura igihe Ramos asigaje kuri kontaro ye muri Real.

'Sinshobora kujya mu ikipe ihatana na Real'

Perez yagize ati: "Nabwiye Ramos ko bidashoboka ko Real Madrid yareka kapiteni wayo akagenda gutyo gusa ku buntu".

Ramos yagize ati: "Nta na rimwe nigeze ntekereza ku kujya gukina mu Bushinwa".

"Ku munsi w'ejo nagiye kureba perezida ngo musobanurire buri kintu cyose".

"Nabwiye perezida ko ntashobora kujya mu ikipe ishobora guhatana na Real Madrid".

"Umunsi umwe nindamuka ngiye, nuko nzaba ntekereza ko umubiri wanjye utakinyemerera gukina byo ku rwego rwo hejuru".

"Ndi kapiteni wa Real Madrid kandi numva nkunzwe cyane kandi nshyigikiwe na bagenzi banjye dukinana".

"Ntabwo nteganya kongerera igihe [kontaro yanjye]. Nshimishijwe n'ibyo mfite. Abantu iteka batekereza ko ari amayeri yo kubona amafaranga menshi, ariko ni ikinyuranyo cyabyo ahubwo".

Ramos yafashije Real gutsindira ibikombe 20 mu myaka 14 ayimazemo, birimo bine bya Champions League n'ibikombe bine bya shampiyona ya La Liga ya Espanye.

Ariko, Real ntiyahiriwe n'umwaka w'imikino wa 2018-2019, yasoje idashoboye gutsindira igikombe.

Ibindi bisa n’ibi