Intamba mu rugamba zagiye muri Qatar ziyobowe na Saido Berahino

Saido Berahino Uwufise ububasha kw’isanamu Getty Images

Ikipe y'igihugu y'Uburundi Intamba mu rugamba yagiye muri Qatar kwitegura imikino ya nyuma y'igikombe cy'Afurika cy'ibihugu, ubu ikaba ifite kapiteni mushya, Saido Berahino.

Berahino - ushobora kwirukanwa n'ikipe ya Stoke City kuri iyi mpeshyi kubera guhamwa n'icyaha cyo gutwara imodoka yanyoye kurenza igipimo cyemewe i Londres - amaze iminsi ari i Burundi hamwe n'ikipe y'igihugu cye.

Amakuru BBC yamenye aremeza ko ku wa gatanu nyuma y'umukino wa gicuti Intamba zakinnye n'ikipe ya Aigle Noir y'i Burundi, ari bwo Berahino yahawe ibendera ry'igihugu nk'uzaba ayoboye abandi bakinnyi muri CAN izabera mu Misiri guhera ku itariki ya 21 y'uku kwezi kwa gatandatu.

Ku rubuga rwa Instagram, Berahino yatangaje ko "yishimiye cyane izi nshingano yahoranye mu nzozi ze kuva ari umwana".

Berahino asimbuye kuri uyu mwanya Nizigiyimana Karim bakunda kwita Makenzi, wari kapiteni w'Intamba mu rugamba mu myaka ishize no mu mikino yo gushaka itike y'iki gikombe cy'Afurika.

Ishyirahamwe ry'umupira w'amaguru mu Burundi ryemeje ko i Doha muri Qatar ikipe y'Uburundi izakina umukino wa gicuti n'ikipe y'igihugu ya Algeria mbere yo kujya mu Misiri.

Ikipe y'igihugu y'Uburundi ni ubwa mbere igiye mu mikino ya CAN. Iri mu itsinda rimwe na Nigeria, Guinea na Madagascar, umukino wa mbere ikazawukina na Nigeria ku itariki ya 22 y'uku kwezi.

Muri iyi mikino, usibye u Rwanda, ibihugu bindi byo muri aka karere bya Uganda, Kenya, Tanzaniya, Repubulika ya Demokarasi ya Kongo ndetse n'Uburundi, byabonye itike yo kuyikina.

Ibindi bisa n’ibi