Nigeria yabonye intsinzi mu gikombe cy’isi cy’abagore

Abakinnyi ba Nigeria bishimira igitego Uwufise ububasha kw’isanamu AFP
Image caption Abakinnyi ba Nigeria bishimira igitego

Ikipe y'igihugu Super Falcons ya Nigeria kuri uyu wa gatatu yabonye amanota atatu mu itsinda A itsinze Koreya y'Epfo, bituma iyi inabura amahirwe yo gukomeza muri 1/8.

Nigeria yatsinze ibitego 2-0 mu mukino waberaga kuri Stade des Alpes mu mujyi wa Grenoble mu Bufaransa.

Ni yo ntsinzi ya mbere y'imwe mu makipe ahagarariye umugabane w'Afurika muri iri rushanwa ry'isi.

Igitego cya mbere mu gice cya mbere kitsinzwe n'umukinnyi wa Koreya y'Epfo witwa Kim Do-yeon naho icya kabiri gitsindwa na rutahizamu Asisat Oshoala ukinira ikipe ya Liverpool.

Nigeria yari yatsinzwe umukino wayo wa mbere na Norway ku bitego bitatu ku busa.

Undi mukino wabaye kuri uyu wa gatatu muri iri tsinda, ni uwo Ubufaransa bwatsinzemo ikipe ya Norway ibitego 2-1.

Umukino wa nyuma muri iri tsinda Nigeria izawukina n'Ubufaransa ku wa mbere, isabwa gutsinda ngo ikomeze muri 1/8, nubwo ishobora no kuzamuka nk'iya gatatu yitwaye neza.

Umutoza wa Nigeria Thomas Dennerby avuga ko bifuza cyane kugera muri 1/8, akavuga ko ku mukino n'Ubufaransa bazakora ibishoboka byose bakahavana nibura inota rimwe.

Uwufise ububasha kw’isanamu BBC Sport
Image caption Uko amakipe ahagaze muri iri tsinda rya mbere