Shampiyona ya Premier League 2019-2020 izatangira Liverpool yakira Norwich

Manchester City ni yo yegukanye igikombe cya Premier League mu myaka ibiri ishize Uwufise ububasha kw’isanamu Getty Images
Image caption Manchester City ni yo yegukanye igikombe cya Premier League mu myaka ibiri ishize

Umwaka w'imikino wa 2019-2020 wa shampiyona y'Ubwongereza, Premier League, uzatangira ku wa gatanu ku itariki 9 y'ukwa munani, Liverpool ifite igikombe cya Champions League yakira Norwich City yazamutse muri iki cyiciro.

Manchester City yegukanye igikombe cya shampiyona mu myaka ibiri ishize, izatangira bucyeye bwaho ikina na West Ham ku kibuga cy'iyi West Ham.

Aston Villa nayo yazamutse muri iki cyiciro izakina na Tottenham, mu gihe indi kipe nayo yazamutse, Sheffield United, izakina na Bournemouth.

Bwa mbere mu mateka ya Premier League, amakipe azagira ikiruhuko gito hagati muri shampiyona kizaba mu kwezi kwa kabiri.

Kizaba mu byumweru bibiri. Mu mpera imwe y'icyumweru, hazaba imikino itanu gusa, nuko indi mikino itanu yo muri icyo cyiciro ibe mu mpera y'icyumweru ikurikiyeho, harebwa niba buri kipe ibona icyumweru cy'ikiruhuko.

Muri iyo mpera y'icyumweru shampiyona izatangiramo, Manchester United nayo izakira Chelsea, mu mukino uzaba ku cyumweru ku itariki ya 11 y'ukwa munani.

Akazi kenshi ku makipe amwe mu ntangiriro

Umukino ubanziriza shampiyona w'igikombe cya Community Shield hagati ya Liverpool na Manchester City uzabera ku kibuga cya Wembley, ku cyumweru ku itariki ya 4 y'ukwa munani.

Liverpool na Chelsea yegukanye igikombe cya Europa League, nazo zizahurira mu mukino w'igikombe cya Super Cup cy'impuzamashyirahamwe y'umupira w'amaguru i Burayi, Uefa, umukino uzabera mu mujyi wa Istanbul muri Turukiya, ku wa gatatu ku itariki ya 14 y'ukwa munani.

Nyuma yaho, Liverpool izakina umukino wayo wa kabiri wa shampiyona ikina na Southampton ku kibuga cya Southampton, mu gihe Chelsea yo izakira Leicester City.