Chelsea yemeye amasezerano yuko umutoza wayo Maurizio Sarri ajya muri Juventus

Maurizio Sarri ntabwo yari bwatsindire igikombe gikomeye muri Chelsea mbere yuko yegukana Europa League mu kwezi gushize kwa gatanu Uwufise ububasha kw’isanamu Getty Images
Image caption Maurizio Sarri ntabwo yari bwatsindire igikombe gikomeye muri Chelsea mbere yuko yegukana Europa League mu kwezi gushize kwa gatanu

Chelsea urebye yemeye amasezerano yuko umutoza wayo Maurizio Sarri ajya gutoza ikipe ya Juventus yo mu Butaliyani ifite igikombe cy'uyu mwaka cya shampiyona yaho ya Serie A.

Ni umwumvikano wagezweho ku mugoroba w'ejo ku wa kane nyuma y'ibiganiro by'abayobozi bakuru b'amakipe yombi.

Byitezwe ko amasezerano nyirizina ashyirwaho umukono kuri uyu wa gatanu.

Byumvikana ko hemejwe ko Chelsea ihabwa ingurane y'inyongera ya miliyoni eshanu z'amapawundi.

Umutoza Sarri w'imyaka 60 y'amavuko yageze muri Chelsea mu kwezi kwa karindwi k'umwaka ushize wa 2018 avuye mu ikipe ya Napoli y'iwabo mu Butaliyani.

Mu mwaka umwe atoza Chelsea, yayifashije kurangiza iri ku mwanya wa gatatu muri shampiyona yo mu Bwongereza ya Premier League ndetse ayihesha n'igikombe cya Europa League.

Nubwo mu kwezi kwa karindwi umwaka ushize yari yashyize umukono kuri kontaro yo kuyitoza mu gihe cy'imyaka itatu, agiye kuba umutoza wa cyenda uyivuyemo kuva iyi kipe yagurwa n'umuherwe Roman Abramovich mu mwaka wa 2003.

Mu gihe yari amaze muri iyi kipe, hakomeje guhwihwiswa ko ashobora kuyivamo, mu gihe abafana ba Chelsea bakomeje kugaragaza ko batishimiye imitoreze ye ndetse n'uburyo ahitamo abakinnyi akinisha.

Kimwe mu bihe bibi yagiriye muri iyi kipe, ni ubwo umunyezamu Kepa Arrizabalaga yangaga gusimburwa mu kwezi kwa kabiri uyu mwaka, mu mukino wa nyuma w'igikombe cya Carabao Cup ku kibuga cya Wembley, mbere gato yuko Manchester City iyitsinda kuri za penaliti.

Kuri ubu, Chelsea ntabwo yemerewe kugura abakinnyi bashya mu gihe cy'imyaka ibiri, nyuma yo guhanwa n'ishyirahamwe ry'umupira w'amaguru ku isi, FIFA.

Chelsea ubu iri kujuririra icyo cyemezo cya FIFA mu rukiko nkemurampaka mu mikino.