Bwa mbere Toronto Raptors yo muri Canada yegukanye igikombe NBA

Raptors ni yo kipe yo muri Canada itwaye NBA Uwufise ububasha kw’isanamu Getty Images
Image caption Raptors ni yo kipe yo muri Canada itwaye NBA

Ikipe ya Toronto Raptors yatwaye igikombe cya shampiyona ya Basketball muri Amerika itsinze ikipe ya Golden State Warriors ku mukino wa gatandatu ku manota 114 ku 110.

Ni inshuro ya mbere igikombe cya NBA gitwawe n'ikipe yo muri Canada ari nayo yonyine yo hanze ya Amerika ikina muri iri rushanwa.

Raptors yatsinze imikino ine kuri ibiri ya Warriors mu mikino ya nyuma ya Play-offs, umukinnyi wayo Kawhi Leonard akaba ari we watoranyijwe nk'umukinnyi warushije abandi muri iyi mikino(MVP).

Muri uyu mukino wa gatandatu, Umunyakameruni Pascal Siakam ni we watsindiye ikipe ya Raptors amanota menshi (26), mugenzi we Serge Ibaka wo muri Kongo Brazaville akaba yatsinze amanota 15.

Kuri iyi ntsinzi, Raptors ishimira cyane umuyobozi wayo Masai Ujiri ufatwa nk'uwagize uruhare runini mu kubaka Toronto Raports nshya ibashije gutwara igikombe, nkuko iyi kipe yabitangaje kuri Twitter.

Ujiri ni Umwongereza ufite nyina w'Umunyakenya na se wo muri Nigeria, akaba azwi mu Rwanda nk'uwatangije umushinga Giants of Africa uzamura abakiri bato bafite impano muri Basketball.

Uwufise ububasha kw’isanamu Getty Images
Image caption Masai Ujiri (wambaye ikoti ry'umukara) hagati mu bakinnyi ba Raptors bishimira igikombe

Iki ni cyo gikombe cya mbere cya NBA Raptors itwaye mu myaka 24 imaze ibayeho, umutoza wayo Nick Nurse akavuga ko rwari urugamba rukomeye cyane.

Naho Kawhi Leonard ati: "Ni yo mpamvu nkina Basketball, iki ni cyo mvunikira".

Warriors yari iherutse gutwara ibikombe bitatu yikurikiranya, muri iyi mikino ya nyuma yavunikishije abakinnyi bayo bakomeye Kevin Durant na Klay Thompson wavunitse mu mukino warangiye muri iki gitondo.

Yarigisigaranye kabuhariwe wayo Stephen Curry wakoze iyo bwabaga ariko agahusha amanota atatu ya nyuma ubwo bari kuri 111 - 110 maze Leonard agahita atsinda amanota yabahaye intsinzi.

Uwufise ububasha kw’isanamu Getty Images
Image caption Kawhi Leonard yishimira intsinzi umukino urangiye

Draymond Green ukinira Warriors yavuze ko buri mukinnyi wabo wese yakinanye umutima wose n'ubwitange ariko barushijwe ikintu gito.

Raptors yinjiye mu mateka y'ikipe ya Basketball yo muri Canada itwaye irushanwa rya NBA bwa mbere.