Angola yihagazeho imbere ya Tuniziya yahabwaga amahirwe menshi

Djalma (iburyo) akina mu ikipe ya Alanyaspor muri Turukiya Uwufise ububasha kw’isanamu Getty Images
Image caption Djalma (iburyo) akina mu ikipe ya Alanyaspor muri Turukiya

Djalma yishyuye igitego Youssef Msakni wa Tuniziya yari yatsinze mu gice cya mbere cy'umukino w'ejo ku wa mbere, afasha Angola kubona inota rimwe, mu mukino w'igikombe cy'Afurika cy'ibihugu (CAN) gikomeje kubera mu Misiri.

Djalma w'imyaka 32 y'amavuko yasonzemo umupira wari ugaruwe n'umunyezamu Farouk Ben Mustapha, ku ishoti yari yatewe na Mateus.

Umukino urangira ari igitego 1-1.

Msakni ni we wari watsindiye Tuniziya ku munota wa 11 kuri penaliti, ku ikosa Naim Sliti yari akorewe na Paizo akamugusha mu rubuga rw'amahina.

Tuniziya yaje muri iri rushanwa iri ku mwanya wa kabiri mu makipe y'Afurika ku rutonde rw'ishyirahamwe ry'umupira w'amaguru ku isi (FIFA), ariko yamaze igihe kinini cy'uwo mukino yagowe na Angola, yabonye iryo nota rimwe irikwiye nyuma yo kwiharira igice cya kabiri.

Mu mukino ukurikiyeho wo muri iri tsinda E, Tuniziya izakina na Mali ku wa gatanu, mu gihe Angola yo izakina na Mauritania ku wa gatandatu.