Saido Berahino yatangiranye intsinzi mu ikipe ye nshya ya Zulte Waregem

Berahino yari kapiteni w'Intamba mu Rugamba mu mikino iheruka y'igikombe cy'Afurika yabereye mu Misiri Uwufise ububasha kw’isanamu Getty Images
Image caption Berahino yari kapiteni w'Intamba mu Rugamba mu mikino iheruka y'igikombe cy'Afurika yabereye mu Misiri

Yabaye intangiriro nziza kuri rutahizamu Saido Berahino ubwo yatsindaga igitego mu mukino ikipe ye nshya ya Zulte Waregem yatsinzemo Genk ibitego 2-0.

Ni umukino ikipe ye yari yasuyemo ikipe ya Genk yatwaye igikombe giheruka cya shampiyona.

Ku wa wa gatanu w'icyumweru gishize, ni bwo uyu kapiteni w'Intamba mu Rugamba z'u Burundi w'imyaka 26 y'amavuko yashyize umukono kuri kontaro y'imyaka ibiri akinira iyi kipe yo mu cyiciro cya mbere.

Nyuma yo gushobora kuba mu bakinnyi 11 batangiye uwo mukino, uyu wahoze ari na rutahizamu wa West Bromwich Albion, yaje kwinjiza igitego cya kabiri cy'iyi kipe ku munota wa 78 w'umukino.

Ku mbuga nkoranyambaga yagize ati: "Mbega intangiriro nziza yo guhora nzirikana!!! Twakinnye neza na bagenzi banjye. Nshimiye cyane abafana bakoze urugendo baje kudushyigikira!"

Ku wa gatatu w'icyumweru gishize ni bwo Berahino yatandukanye n'ikipe ya Stoke City ku "bwumvikane bw'impande zombi".

Yayivuyemo ayitsindiye ibitego bitanu gusa mu mikino 56 yayikiniye - uwa nyuma akaba yarawukinnye mu kwezi kwa kabiri akina na West Bromwich Albion nayo yahoze akinamo.

Ibindi bisa n’ibi