Lionel Messi avuga ko yari 'gushimishwa' n'igaruka rya Neymar muri Barcelone

Messi yakinanye na Neymar mu myaka ine y'imikino muri Barcelone Uwufise ububasha kw’isanamu AFP
Image caption Messi yakinanye na Neymar mu myaka ine y'imikino muri Barcelone

Lionel Messi avuga ko yari "gushimishwa" nuko Neymar asubiye muri Barcelone kuko kugaruka kwe "kwari kongera amahirwe yo kugera ku ntego zacu".

Neymar w'imyaka 27 y'amavuko, yageze muri Paris Saint-Germain (PSG) avuye muri Barcelone mu mwaka wa 2017.

Icyo gihe yaguzwe amafaranga ya mbere ku isi ku mukinnyi w'umupira w'amaguru - miliyoni 222 z'ama-Euro.

Aganira n'ikinyamakuru Sport cyo muri Espanye, Messi yagize ati: "Yashakaga cyane kugaruka. Ntabwo nzi niba ikipe yaragerageje [kumugarura] cyangwa itaragerageje".

Neymar yatsinze ibitego 105 mu mikino 186 yakiniye Barcelone hagati y'umwaka wa 2013 na 2017, ndetse amaze gutsindira PSG ibitego 51 mu mikino 58 amaze kuyikinira.

Amakuru yakomeje kuvuga ko Neymar yari gusubira muri Barcelone mu igura n'igurishwa ry'abakinnyi ryo kuri iyi mpeshyi, nubwo byavuzwe ko urebye nta kipe n'imwe - yaba Barcelone cyangwa PSG - yari yizeye ko koko indi ishaka kugera kuri ayo masezerano.

Messi w'imyaka 32 y'amavuko yagize ati: "Nari gushimishwa no kubona Neymar agarutse".

"Abadashaka ko yari kugaruka nabo ndabumva, kandi birumvikana ibyabaye kuri 'Ney' n'uburyo yagiye".

"Ariko mbitekerejeho nk'umukinnyi, ntekereza ko Neymar ari umwe mu bakinnyi beza cyane ku isi kandi kumugira mu ikipe yacu byari kongera amahirwe yo kugera ku ntego zacu".

'Aha ni mu rugo'

Messi yahakanye ko abakinnyi ba Barcelone basabye iyi kipe kugura Neymar, yongeraho ati: "Twatanze ibitekerezo byacu niba byaba byiza agarutse cyangwa atagarutse, ariko ntitwigeze tuvuga ko bagomba kumugura".

Nubwo atashoboye kongera gukinana n'uyu rutahizamu ukomoka muri Brazil, Messi yavuze ko "atacitse intege".

Yongeyeho ko Barcelone ifite "abakinnyi b'ibitangaza bashobora kugera ku cyo ari cyo cyose atanahari [Neymar]".

Messi, ukomoka muri Argentine, yageze muri Barcelone mu mwaka wa 2001. Kontaro ye y'ubu izarangira mu mwaka wa 2021.

Yongeyeho ati: "Igitekerezo cyanjye ni ugukomeza gukina hano kugeza igihe cyose ngishoboye gukina ku rwego rusabwa kandi n'uko umubiri wanjye ubinyemerera".

"Aha ni mu rugo. Sinteganya kujya ahandi aho ari ho hose mu gihe cyose dukomeje guhatana no gutsinda".