Avugwa mu mupira w'amaguru i Burayi 4/10/2019: Wilson, Mandzukic, Eriksen, Willian, Messi

Callum Wilson Uwufise ububasha kw’isanamu Getty Images
Image caption Callum Wilson

Callum Wilson, rutahizamu wa Bournemouth n'uw'ikipe y'igihugu y'Ubwongereza w'imyaka 27, na Mario Mandzukic w'imyaka 33 ukinira Juventus, bari mu bashakishwa cyane na Manchester United nka ba rutahizamu, mu igura n'igurishwa ry'abakinnyi ryo mu kwezi kwa mbere. (Sky Sports)

Christian Eriksen, umukinnyi wo hagati wa Tottenham n'ikipe y'igihugu ya Denmark, yizeye ko bigishoboka ko yerekeza muri Real Madrid, mu gihe ushinzwe gushakira isoko uyu mukinnyi w'imyaka 27 biteganyijwe ko yerekeza muri Espanye mu biganiro na Real Madrid mu mpera y'iki cyumweru. (Star)

Uwufise ububasha kw’isanamu Getty Images
Image caption Christian Eriksen

Maurizio Sarri wahoze ari umutoza wa Chelsea yizeye kongera gusubirana na rutahizamu Willian w'imyaka 31 muri Juventus - ariko umutoza Frank Lampard wa Chelsea yahishuye ko uyu Willian ukomoka muri Brazil ari mu biganiro na Chelsea bijyanye na kontaro nshya. (Calciomercato)

Martin Odegaard, umukinnyi wa Real Madrid w'imyaka 20 ukina hagati mu kibuga ukomoka muri Norvège - kuri ubu ukina nk'inguzanyo muri Real Sociedad - ari gushaka kugusubira gukina muri Real Madrid, mu gihe amakipe ya Liverpool na Manchester United amwifuza. (Goal)

Manchester United yirengagije amahirwe yo kugura umukinnyi wa Arsenal Gabriel Martinelli w'imyaka 18 ku mpeshyi y'uyu mwaka, kuri ubu uyu rutahizamu ukomoka muri Brazil akaba amaze gutsinda ibitego bine mu mikino itatu amaze gukinira Arsenal. (Mirror)

Uwufise ububasha kw’isanamu Getty Images
Image caption Gabriel Martinelli ni we mukinnyi wa mbere Arsenal yaguze ku mpeshyi y'uyu mwaka

Fabio Capello wahoze atoza ikipe y'igihugu y'Ubwongereza yahishuye ko yagerageje kugura ku nguzanyo Lionel Messi, umukinnyi ukomeye wa Barcelone w'imyaka 32 ukomoka muri Argentine, ubwo yatozaga Juventus. (Sky Sports Italia, via Mail)

Chris Hughton wahoze ari umutoza wa Brighton yanze kontaro yo gutoza ikipe ya Stoke City ikina mu cyiciro cya Championship, kuri ubu iri mu bihe bibi. (Mirror)

Uwufise ububasha kw’isanamu Getty Images
Image caption Mario Mandzukic

Inter Milan ntabwo yigeze ishyiramo ingingo ijyanye n'ayo azagurishwa mu gihe kizaza ubwo yari mu biganiro na Manchester United ku masezerano y'inguzanyo ya rutahizamu Alexis Sanchez ukomoka muri Chili kuko andi makipe nayo yamushakaga ikagira ubwoba ko byari gutuma ibura burundu uyu mukinnyi w'imyaka 30. (Calciomercato)

Ikipe ya Los Angeles Galaxy yo muri shampiyona ya Major League Soccer yo muri Amerika iri gukurikiranira hafi rutahizamu Alfredo Morelos wa Rangers w'imyaka 23 ukomoka muri Colombia. (Star)

Uwufise ububasha kw’isanamu Getty Images
Image caption Lionel Messi (ibumoso) na Cristiano Ronaldo (iburyo)

Mu mwaka ushize w'imikino, Real Madrid yatekereje ku kugira Antonio Conte umutoza wayo mukuru, mbere yuko uyu wahoze atoza Chelsea asubira gutoza ikipe ya Inter Milan y'iwabo mu Butaliyani. (Fichajes.net, via Calciomercato)

Leicester City ishobora kuba yagura Burak Ince, umukinnyi ukina hagati w'imyaka 15 ukomoka muri Turukiya, unifuzwa n'amakipe ya Manchester City, Lille na Freiburg. (Fotospor)

Uwufise ububasha kw’isanamu Getty Images
Image caption Willian (iburyo)

Lukas Podolski wahoze akinira Arsenal, yateye urwenya ko rutahizamu Serge Gnabry wa Bayern - na we wigeze gukinira Arsenal - akwiye gushimwa nk'umukinnyi w'uku kwezi muri shampiyona ya Premier League yo mu Bwongereza, nyuma yaho Serge w'imyaka 24 atsindiye ibitego bine wenyine mu mukino ikipe ye yanyagiyemo Tottenham Hotspur ibitego 7 - 2 muri Champions League ku wa kabiri. (Mirror)

Ibindi bisa n’ibi