Joël Matip yahawe kontaro nshya muri Liverpool yo kugera mu 2024

Matip amaze gutsinda ibitego bine mu mikino 82 amaze gukinira Liverpool muri shampiyona ya Premier League Uwufise ububasha kw’isanamu Getty Images
Image caption Matip amaze gutsinda ibitego bine mu mikino 82 amaze gukinira Liverpool muri shampiyona ya Premier League

Myugariro Joël Matip wa Liverpool yashyize umukono kuri kontaro nshya y'igihe kirekire izatuma akinira iyi kipe kugeza ku mpeshyi (icyi) yo mu mwaka wa 2024.

Uyu mukinnyi w'imyaka 28 ukomoka muri Cameroun, amaze gutsindira Liverpool ibitego bibiri mu mikino icyenda mu marushanwa atandukanye amaze gukinira Liverpool muri uyu mwaka w'imikino.

Matip yageze muri Liverpool mu mwaka wa 2016 avuye muri Schalke yo mu Budage, akaba yarafashije Liverpool kwegukana igikombe cya Champions League mu mwaka w'imikino wa 2018 - 2019.

Matip yagize ati: "Ni ibintu byiza cyane kuba muri gahunda y'igihe kirekire y'iyi kipe. Rwose ni ibintu byiza cyane".

"Iyo ubirebera hanze, umenya ko Liverpool ari ikipe ikomeye - ariko iyo uri imbere [muri Liverpool], noneho bwo rwose wumva ukuntu iyi kipe ikomeye mu bihugu byose - ifite abafana ahantu hose. Ni ikipe ikomeye kuburyo ntekereza ko buri mukinnyi yashaka kuyikinira".

Matip yongeyeho ati: "Dufite ikipe ikiri nto mu myaka kandi ifite impano ndetse ntekereza ko buri wese muri twe asonzeye [intsinzi]. Ubu twamaze kubona uko gutsindira ikintu bimera, kandi turashaka kongera kwiyumva gutyo [twatsinze] nanone".

Kubera imvune, Matip ntiyakinnye imikino ibiri ya nyuma ya Liverpool mbere yuko hatangira ikiruhuko kigufi muri shampiyona, ariko biteganyijwe ko azakina umukino w'ejo ku cyumweru ubwo izaba yasuye Manchester United.