Robert Lewandowski yaciye umuhigo muri Bundesliga

Nta wundi mukinnyi uratsinda ibitego byinshi kurusha Lewandowski kugeza ubu muri uyu mwaka wa 2019

Ahavuye isanamu, Getty Images

Insiguro y'isanamu,

Nta wundi mukinnyi uratsinda ibitego byinshi kurusha Lewandowski kugeza ubu muri uyu mwaka wa 2019

Robert Lewandowski yaraye abaye umukinnyi wa mbere muri shampiyona ya Bundesliga yo mu Budage utsinze mu mikino icyenda ibanza mu mwaka w'imikino.

Yabigezeho ubwo ikipe ye ya Bayern Munich yajyaga ku mwanya wa mbere ku rutonde rw'agateganyo rwa shampiyona nyuma yo gutsinda Union Berlin ibitego 2 - 1.

Igice cya kabiri cy'uwo mukino kigitangira, uyu rutahizamu w'imyaka 31 y'amavuko ukomoka muri Pologne yatsinze igitego cye cya 19 kugeza ubu muri uyu mwaka w'imikino.

Icya mbere cy'iyi kipe cyari cyatsinzwe na myugariro w'Umufaransa Benjamin Pavard, mu gice cya mbere cy'umukino.

Rutahizamu w'Umudage Sebastian Polter yaje gutsindira ikipe ye ya Union Berlin igitego kimwe mu gice cya kabiri, ariko umukino uza kurangira gutyo ku ntsinzi ya Bayern.

Mu wundi mukino, Borussia Dortmund yahise ijya ku mwanya wa gatatu nyuma yo kunganya 0 - 0 na Schalke.

Intsinzi ya Bayern yatumye irusha inota rimwe Freiburg, iyi nayo ikaba yageze ku mwanya wa kabiri nyuma yo gustinda RB Leipzig ibitego 2 - 1.

Borussia Monchengladbach na Wolfsburg zishobora gusubira mu myanya ibiri ya mbere niziramuka zitsinze imikino yazo yo kuri iki cyumweru.

Nta wundi umurusha ibitego muri uyu mwaka

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Muri uyu mwaka, nta wundi mukinnyi uratsindira ikipe ye ibitego byinshi kurusha Lewandowski. Igitego yaraye atsinze cyatumye yuyuza ibitego 37 mu mikino yose amaze gukina kugeza ubu muri uyu mwaka wa 2019. Ibyo biruta ibyo Lionel Messi, Cristiano Ronaldo na Kylian Mbappe bamaze gutsinda.

Igitego yatsinze mu mukino wahuje Bayern na Union Berlin cyakuyeho umuhigo wari ufitwe n'Umunye-Gabon Pierre-Emerick Aubameyang - kuri ubu ukinira Arsenal - watsinze muri buri mukino mu mikino umunani ibanza ya shampiyona mu mwaka wa 2015 - 2016 ubwo yakiniraga Borussia Dortmund.

Byose hamwe, Lewandowski amaze gutsinda ibitego 19 mu mikino 14 amaze gukina mu marushanwa yose muri uyu mwaka w'imikino, harimo no muri buri mukino muri 13 ishize ya Bayern.

Aho atatsinze ni mu mukino umwe gusa ubwo Bayern yatsindwaga 2 - 0 na Dortmund mu gikombe cy'Ubudage cya Super Cup , ku itariki ya gatatu y'ukwezi kwa munani.

Yanatsinze ibitego bitatu mu mukino ikipe y'igihugu cye cya Pologne yakinnye na Latvia mu ntangiriro y'uku kwezi kwa cumi, mu gushaka itike yo gukina imikino y'igikombe cya Euro yo mu mwaka utaha wa 2020.