Umukino wabayemo ibitego 10…nako '19'

Umutoza Klopp wa Liverpool yavuze ko umunyezamu Kelleher ari "impano idasanzwe' Uwufise ububasha kw’isanamu Getty Images
Image caption Umutoza Klopp wa Liverpool yavuze ko umunyezamu Kelleher ari "impano idasanzwe'

Intsinzi ya Liverpool itsinda Arsenal kuri za penaliti nyuma yaho iminota isanzwe y'umukino irangiye amakipe yombi anganya ibtego 5 - 5, yayihesheje itike ya kimwe cya kane mu mikino y'igikombe cya Carabao Cup.

Ni umukino waraye ubereye ku kibuga Anfield cya Liverpool.

Umunyezamu Caoimhin Kelleher w'imyaka 20 y'amavuko wa Liverpool, yakuyemo penaliti ya Dani Ceballos, naho Curtis Jones w'imyaka 18 yinjiza penaliti ya nyuma ya Liverpool, birangira Liverpool ari yo itsinze kuri penaliti 5 - 4.

Nyuma y'uwo mukino, abatoza bombi bagize icyo batangaza.

Umutoza Jurgen Klopp wa Liverpool yabwiye Sky Sports ati: "Twakoze amakosa amwe n'amwe, duhererekanya umupira mu buryo buciriritse. Twanagiye tunyuzamo tugafungura umukino cyane".

"Dushobora kuvuga ku mayeri y'umukino, ariko se ni nde ubyitayeho mu ijoro [ejo ku wa kabiri] nk'iri? Nari nizeye ko abahungu bakina umukino bazahora bibuka. Ibyo bakoze - rwose byandenze!"

Yongeyeho ati: "[Curtis] Jones… byarangiye atari icyemezo cyanjye ko ari we uza gutera penaliti ya nyuma. Ubwo narebaga ku rutonde, Origi ni we wari gutera penaliti ya nyuma kandi bigaragara ko ibyo baje kubihindura".

Uwufise ububasha kw’isanamu Getty Images
Image caption Kuva yatangira gukinira Arsenal mu 2013, Mesut Ozil amaze gutanga imipira yavuyemo ibitego 70 mu marushanwa yose amaze gukina - birutaho 28 iby'undi mukinnyi uwo ari we wese

Ku ruhande rw'umutoza Unai Emery wa Arsenal, we yabwiye Sky Sports ati: "Wari umukino w'ubusazi. Ntewe ishema cyane [n'uko abakinnyi bitwaye], twakiniraga ku muriri uri hejuru mu minota 45 ya mbere".

"Byasaga nkaho twatsinze umukino, mbere yuko haba igikorwa cya nyuma. Kuri penaliti, amakipe aba anganya amahirwe 50/50, twe twatsinzwe".

"Turababaye ariko akazi kacu, imikinire yacu dukwiye kuyikomeza. Hari ibintu byinshi byiza byo gukura muri uyu mukino. Mu bwugarizi, amakipe yombi ntabwo ashobora kubyishimira. Ariko ku bafana, yari iminota 90 iryoheye ijisho. Ibintu byamaga bihinduka. Byari binogeye ijisho".

Ku isaha ya 08:45 GMT (ni ukuvuga saa yine na 45 mu Rwanda no mu Burundi), ni bwo haba tombola, Liverpool ikamenya ikipe bazahura muri kimwe cya kane.

Uwo mukino wa Liverpool na Arsenal wabaye uwa mbere ikipe itozwa na Jurgen Klopp itsindiwe iwayo ibitego 5 kuva mu kwezi kwa cyenda mu 2009 ubwo Borussia Dortmund yatozaga yatsindwaga na Bayern Munich ibitego 5 - 1 muri shampiyona y'Ubudage ya Bundesliga.

Ibindi bisa n’ibi