Bayern Munich igiye kugirana ibiganiro na Arsène Wenger

Arsène Wenger yatoje Nancy na Monaco mu Bufaransa, atoza Grampus Eight mu Buyapani na Arsenal mu Bwongereza Uwufise ububasha kw’isanamu Getty Images
Image caption Arsène Wenger yatoje Nancy na Monaco mu Bufaransa, atoza Grampus Eight mu Buyapani na Arsenal mu Bwongereza

Arsène Wenger wahoze ari umutoza wa Arsenal azagirana ibiganiro n'ikipe ya Bayern Munich yo mu Budage mu cyumweru gitaha ku mwanya w'umutoza w'iyi kipe kuri ubu udafite uwurimo.

Wenger w'imyaka 70 yabwiye igitangazamakuru Bein Sports ko ari guteganya kuvugana na Karl-Heinz Rummenigge, umukuru w'inama nyobozi ya Bayern.

Ni nyuma yaho mu ntangiriro y'iki cyumweru, iyi kipe ifite igikombe cya shampiyona ya Bundesliga yirukaniye Niko Kovac wari umutoza wayo.

Bibaye kandi nyuma yaho Rummenigge yari yavugiye ko Wenger "atari gutekerezwaho nk'umutoza".

Wenger yagize ati: "Twafashe icyemezo hamwe ko tuzaganira mu cyumweru gitaha kuko ubu ndi i Doha [muri Qatar] kugeza ku cyumweru. Iyi ni inkuru y'impamo".

"Ku wa gatatu nyuma ya saa sita, Rummenigge yarampamagaye. Ntabwo nashoboye kumwitaba, nuko by'ikinyabupfura nyuma ndamuhamagara".

"Yari mu modoka ye agiye ku mukino wabahuje na Olympiakos. Twavuganye nk'iminota ine cyangwa itanu, ambwira ko bashyizeho [Hans-Dieter] Flick nk'umutoza - azatoza imikino ibiri iri imbere".

"[Rummenigge] Yambajije niba nakwifuza kuyitoza kuko bari gushakisha umutoza. Namubwiye ko nta bitekerezo mbifiteho - bisaba akanya ko kubitekerezaho".

Wenger yamaze imyaka 22 atoza Arsenal, yegukana igikombe cya Premier League inshuro eshatu n'icya FA inshuro zirindwi, mbere yuko ava muri iyi kipe mu mpera y'umwaka w'imikino wa 2017 - 2018.

Nyuma y'imikino 11 muri shampiyona ya Bundesliga y'uyu mwaka, Bayern iri ku mwanya wa gatanu, irushwa amanota ane na Borussia Monchengladbach iri ku mwanya wa mbere.

Bayern kandi yatsinzwe ibitego 5 - 1 na Eintracht Frankfurt mu mukino wa nyuma Kovac yayitoje.

Ariko iri kwitwara neza mu mikino ya Champions League, kandi intsinzi yayo y'ibitego 2 - 0 kuri Olympiakos iyi Bayern itozwa by'agateganyo na Flick, yabaye intsinzi ya kane mu mikino ine yayo mu matsinda.

Mu ntangiriro y'ukwezi gushize kwa cumi, Bayern, yarigitozwa na Kovac, yanyagiye Tottenham ibitego 7 - 2 mu mukino wa Champions League wabereye ku kibuga cya Tottenham i London.

Ibindi bisa n’ibi