Robert Lewandowski yanditse amateka y'ibitego bine byihuse cyane muri Champions League

Robert Lewandowski yinjiza igitego cye cya kane muri uwo mukino Uwufise ububasha kw’isanamu Reuters
Image caption Robert Lewandowski yinjiza igitego cye cya kane muri uwo mukino

Robert Lewandowski yaraye abaye umukinnyi wa mbere utsinze ibitego bine byihuse cyane mu mateka ya Champions League ubwo ikipe ye ya Bayern Munich yanyagiraga Red Star Belgrade yo muri Serbia ibitego 6 - 0 mu mukino wo mu itsinda B.

Uyu rutahizamu ukomoka muri Pologne byamufashe iminota 14 n'amasegonda 31 gusa ngo abe atsinze ibyo bitego bine.

Yabaye umukinnyi wa kabiri gusa mu mateka utsinze yikurikiranya mu mikino icyenda yo mu matsinda ya Champions League.

Leon Goretzka ni we watsinze igitego cya mbere cya Bayern ku mupira yaherejwe na Philippe Coutinho, mu gihe Corentin Tolisso yashyizemo icya gatandatu.

Ku rubuga nkoranyambaga rwa Twitter, Lewandowski yagize ati: "Ngomba kubabwiza ukuri… nagizwe imbata no gutsinda ibitego…"

Lewandowski agejeje ku bitego 30 amaze gutsindira iyi kipe n'igihugu cye muri uyu mwaka w'imikino, muri uwo mukino wari uwa 24 akinnye mu mikino yose kugeza ubu.

Ibitego 10 muri ibyo yabitsinze mu mikino yo mu matsinda ya Champions League.

Uyu Munya-Pologne w'imyaka 31 y'amavuko yinjije penaliti ku munota wa 53 yabaye igitego cya kabiri cya Bayern, mu minota irindwi ya nyuma yaho (ku wa 60, 64 n'uwa 67) atsinda ibindi bitego bitatu mu buryo umunyezamu Milan Borjan wa Red Star na we atasobanukiwe.

Mu mwaka wa 2015, Lewandowski yatsinze ibitego bitanu mu minota icyenda nyuma yo kwinjira mu kibuga asimbuye, mu mukino Bayern yatsinzemo Wolfsburg - wabaye umuhigo w'ibitego bitanu byihuse cyane bitsinzwe n'umukinnyi umwe mu mateka ya shampiyona ya Bundesliga yo mu Budage.

Bayern Munich imaze gutsinda imikino yose itanu imaze gukina mu itsinda ryayo rya B ndetse yamaze kubona itike yo gukina icyiciro gikurikiyeho aho ikipe itsinzwe ihita ivamo. Yakigezemo ari yo iyoboye iryo tsinda.

Uko gutsindwa kwa Red Star kuvuze ko Tottenham y'umutoza Jose Mourinho isanze Bayern mu mikino ya 1/8 iri ku mwanya wa kabiri nyuma yo gutsinda Olympiakos ibitego 4 - 2.

Intsinzi ya Bayern ni inkuru nziza kandi ku mutoza wayo w'inzibacyuho Hansi Flick, kuri ubu utoza Bayern kuva yakwirukana uwari umutoza wayo Niko Kovac ubwo yari imaze gutsindwa ibitego 5 - 1 na Eintracht Frankfurt.

Amakuru yakomeje kuvuga ko Mauricio Pochettino wahoze atoza Tottenham ashobora kubona akazi ko gutoza Bayern, ariko umutoza wayo w'inzibacyuho Flick amaze kuyihesha intsinzi enye mu mikino ine n'igiteranyo cy'ibitego 16.

Ibindi bisa n’ibi