Pep Guardiola: Ati 'Ukuri kuzatsinda' ku gihano cyo guhagarikwa mu marushanwa y'Uburayi

Kevin de Bruyne na Pepe Guardiola Uwufise ububasha kw’isanamu Getty Images
Image caption Kevin de Bruyne yatsinze igitego anatanga ipasi yavuyemo ikindi mu mukino wa mbere City yakinnye nyuma y'igihano yahawe na Uefa

Umutoza wa Manchester City Pep Guardiola avuga ko azaguma mu ikipe 100% kandi ko yizera ko "ukuri kuzatsinda", nyuma y'uko City ihagarikiwe mu marushanwa y'Uburayi.

City ifite igikombe cya shampiyona y'Ubwongereza izwi nka Premier League, yahawe igihano cyo guhagarikwa imyaka ibiri mu irushanwa ry'amakipe yabaye aya mbere iwayo mu Burayi rizwi nka Champions League.

Yanaciwe ihazabu ya miliyoni 30 z'ama Euro [amafaranga akoreshwa mu muryango w'Ubumwe bw'Ibihugu by'Uburayi].

Nyuma y'icyo cyemezo cyafashwe n'ishyirahamwe ry'umupira w'amaguru mu Burayi, Uefa, City ivuga ko izajurira mu rukiko nkemurampaka rw'imikino.

Guardiola yagize ati: "Turajurira. Iyo umuntu yizera ko ari mu kuri, agomba kwirwanaho. Turi abanyamwuga mu kibuga, ibibera hanze yacyo ntitwabigenzura cyane."

Nyuma y'umukino waraye ubaye ku wa Gatatu Manchester City yatsinzemo West Ham 2-0 muri shampiona, yongeyeho ati: "Twavuze ko ari byo tugomba gukora kugeza ku mpera ya shampiyona, cyane cyane ku bantu bakunda iyi kipe.

"Tuzakina umupira wacu ku buryo bwiza bushoboka. Dufite ibintu byinshi bishimishije byo gukinira."

Igihe yabazwaga niba azaguma muri Manchester City igihano yahawe nikigumaho, yagize ati: "Nibatanyirukana nzaba ndi hano. Nkunda iyi kipe. Nkunda kuba hano. Iyi ni ikipe yanjye kandi nzaguma hano, uko byagenda kose.

"Ikipe igomba guhangana kandi nizera ikipe 100%, ibyo bakoze n'ibyo bansobanuriye. Ibintu ntibirarangira, tuzategereza ariko igihe icyemezo [cya nyuma] kitarafatwa ugomba gukina kandi gukina ni byo tuzakora."

Ku wa Kane, umukinnyi wa City ukina mu binyuma, Aymeric Laporte, yavuze ko abakinnyi badatekereza ku gihano cya Uefa.

Uwufise ububasha kw’isanamu PA
Image caption Abafana ba Manchester City bagaragaje ibyapa byamagana Uefa mu mukino wabereye kuri sitade Etihad ku wa Gatatu

Yagize ati: "Turi abanyamwuga, ikipe ikomeye kandi irimo abantu b'ijambo mu rwambariro, kandi ntekereza ko dutekereza ku mupira w'amaguru, nta kindi."

Yongeyeho ati: "Turi abanyamwuga kandi tugomba gukora akazi kacu. Ni ibyo."

Kurenga ku mabwiriza

Ishami ryigenga rigenzura imikoreshereze y'imari mu makipe rizwi nka Club Financial Control Body (CFCB) ryavuze ko ryasanze City yararenze ku mabwiriza "ikabya mu nyungu ziri muri konti yayo ikura mu baterankunga kandi ko yanze gukorana n'abakora iperereza".

Ku wa Gatanu w'icyumweru gishize, City yavuze ko ngo "yababajwe n'icyi cyemezo kibogamye" kandi ko izakijuririra, kandi kuri uyu wa Gatatu umuyobozi mukuru wa Manchester City, Ferran Soriano, yatsindagiye ko ibi birego bishinjwa ikipe ye "atari ukuri".

Ibindi kuri iyi nkuru