Ronaldinho afungishijwe ijisho muri Paraguay nyuma yo gusohoka muri gereza

Ronaldinho yasanganiwe n'unshuti ze kuri hoteli iri Asuncion aho yategetswe kuguma

Ahavuye isanamu, EPA

Insiguro y'isanamu,

Ronaldinho yasanganiwe n'unshuti ze kuri hoteli iri Asuncion aho yategetswe kuguma

Ronaldo de Assis Moreira, uzwi cyane nka Ronaldinho Gaúcho cyangwa Ronaldinho, yarekuwe ava muri gereza ariko aracyafungishijwe ijisho muri Paraguay.

Uyu wegukanye umupira wa zahabu (Ballon d'Or) mu 2005, yari amaze igihe muri gereza n'umuvandimwe we.

Ni nyuma yaho bari batawe muri yombi ku itariki ya 6 y'ukwezi gushize kwa gatatu, bashinjwa gukoreshwa inyandiko z'inzira (passports) mpimbano.

Mbere bari bangiwe gufungurwa by'agateganyo, ariko ubu noneho batanze ingurane ingana n'amadolari y'Amerika 800,000 buri umwe umwe.

Ubu bagomba gukomeza kuba muri hoteli y'inyenyeri enye yo mu murwa mukuru Asuncion wa Paraguay, bategereje kuburanishwa.

Bombi, Ronaldhinho w'imyaka 40 y'amavuko n'umuvandimwe we Roberto Assis, bahakana bavuga ko nta kibi bakoze.

Umwunganizi wabo mu mategeko yavuze ko ifungwa ryabo "ntacyo ryakurikije, ririmo ihohotera kandi rinyuranyije n'amategeko".

Mu kwemerera abo bavandimwe bombi gusohoka muri gereza, umucamanza Gustavo Amarilla yavuze ko inguranye barishye "ifatika".

Yongeyeho ko iyo ngurane yabo igaragaza ko "batazahunga" ubutabera.

Ronaldinho yari yageze muri Paraguay agiye kwamamaza igitabo cye ndetse ari no mu gikorwa cy'ubuvugizi bw'abana bakomoka mu miryango icyennye.

Uyu wegukanye igikombe cy'isi cyo mu 2002 ari kumwe n'ikipe ya Brazil, yakiniye amakipe nka Paris Saint-Germain, Barcelona na AC Milan.

Yasezeye ku mupira w'amaguru mu mwaka wa 2015, nyuma yo kumara igihe akina mu ikipe ya Fluminense FC y'iwabo muri Brazil.

Yabaye umukinnyi wa FIFA (Fifpro World Player) mu mwaka wa 2005 no mu wa 2006.