Umutoza Steven Gerrard wa Rangers avuga ko abafana ba Liverpool bakomeye kuri Jurgen Klopp
Ahavuye isanamu, Getty Images
Gerrard (ibumoso) yakoranye na Klopp muri Liverpool, we ari umutoza w'ingimbi
Steven Gerrard, umutoza w'ikipe ya Rangers yo muri Scotland, avuga ko afite inzozi zo kuzaba umutoza wa Liverpool, ariko ko yizeye ko Jurgen Klopp akomeza kuyitoza "mu myaka myinshi".
Iyi Liverpool y'umutoza Klopp imaze gutsindwa imikino itandatu yirukiranya yakiniye ku kibuga cyayo, Anfield, byatumye ubu ifite ibyago byuko ishobora kurangiza shampiyona y'uyu mwaka itari mu makipe ane ya mbere.
Hagati aho, Gerrard yahesheje Rangers igikombe cya mbere cya shampiyona ya Scottish Premiership mu myaka 10 yari ishize, ibintu byatumye hibazwa niba hari igihe ashobora kuzatoza Liverpool.
Gerrard w'imyaka 40, yabwiye televiziyo ITV yo mu Bwongereza ati: "Abafana ba Liverpool ntabwo bashaka ko mba umutoza".
"Barashaka ko Jurgen Klopp akomeza kuba umutoza wa Liverpool - kandi jyewe wese ndi kumwe na bo bose [kuri iyo ngingo]".
"Ntidukwiye kuba tuvuga kuri ibi. Dufite umwe mu batoza beza cyane urimo gutoza ikipe yacu kuri uyu munota. Ndamukunda".
"Mfite akazi hano. Sintekereza ko hari icyo bifasha kuvuga kuri ibi kandi nizeye ko Jurgen aguma muri Liverpool imyaka myinshi".
Klopp yamaze kuvuga ko adateganya gusimbura Joachim Low wavuze ko kuri iyi mpeshyi azasezera ku gutoza ikipe y'igihugu y'Ubudage.
Ndetse yasezeranyije ko azarangiza kontaro afitanye na Liverpool yo kuyitoza kugeza mu mwaka wa 2024.
Klopp, Umudage w'imyaka 53, yagejeje Liverpool ku gikombe cya Champions League mu mwaka wa 2019 ndetse mu mwaka ushize ayigeza no ku gikombe cya mbere cya shampiyona ya Premier League mu myaka 30 yari ishize.
Ariko, kuri ubu Liverpool iri ku mwanya wa munani ku rutonde rwa shampiyona, irushwa amanota 22 na Manchester City iri ku mwanya wa mbere.
Nta yindi nshuro itari mu mwaka w'imikino wa 1953-1954 - ubwo Liverpool yasozaga iri ku mwanya wa nyuma muri shampiyona ya kera yitwaga First Division - iyi kipe yigeze itsindwa imikino itandatu ku kibuga cyayo mu mwaka umwe w'imikino.
Gerrard yakiniye Liverpool imikino 710. Yayikozemo nk'umutoza w'ingimbi mbere yuko aba umutoza wa Rangers mu mwaka wa 2018.
Yongeyeho ati: "Liverpool ni ikipe yanjye. Nayigiriyemo ibihe byiza. Ni inzozi zanjye ko umunsi umwe nazaba umutoza wa Liverpool? Yego, ni byo, ariko ntiharagera kandi ni nde wavuga ko hari igihe na kimwe nzabikora neza bihagije?"
