Anthony Martial ashobora kutongera gukina muri uyu mwaka – umutoza Ole Gunnar

Anthony Martial

Ahavuye isanamu, Reuters

Insiguro y'isanamu,

Anthony Martial - wavunikiye mu mukino wa Kazakhstan mu mpera y'ukwezi gushize - amaze gutsinda igitego kimwe mu mikino 27 yakiniye Ubufaransa

Manchester United ishobora kuba igiye gukina imikino isigaje muri uyu mwaka w'imikino idafite rutahizamu wayo Anthony Martial nyuma yo kuvunika arimo gukinira Ubufaransa, nkuko umutoza Ole Gunnar Solskjaer abivuga.

Martial, w'imyaka 25, yakiniye Ubufaransa mu mukino wabuhuje na Ukraine n'uwabuhuje na Kazakhstan mu mpera y'ukwezi gushize, aza kuvunika mu ivi.

Umutoza Ole yagize ati: "Kubura Anthony mu gishobora kuba igihe gisigaye cy'uyu mwaka w'imikino birababaje cyane".

Ati: "Amakuru yavaga mu Bufaransa yari uko [imvune] idakomeye ariko biragaragara ko ari mbi".

Nyuma, mu kiganiro na BT Sport, umutoza Ole yongeyeho ko ikipe "yizeye kongera kumubona ayikinira mbere y'impera y'uyu mwaka w'imikino ariko ntitubizi neza".

Martial yatsindiye Manchester United ibitego birindwi muri uyu mwaka mu mikino yose muri rusange, ariko yatsinze bitatu gusa mu mikino 19 mu 2021.

Byitezwe ko United iba idafite myugariro Eric Bailly "mu gihe gito" kiri imbere nkuko umutoza Ole yabivuze, kubera ko bamusanzemo coronavirus ubwo yari kumwe n'ikipe y'igihugu ya Côte d'Ivoire, akaba atarasubira mu Bwongereza.

Ku wa kane w'iki cyumweru no ku wa kane w'icyumweru gitaha, United izahura na Granada yo muri Espagne muri kimwe cyane cy'irushanwa rya Europa League, ndetse ijye gukina na Tottenham iwayo ku cyumweru.