Atletico Madrid yegukanye La Liga iyitesheje Real, Suarez ati 'Ndayishimiye ko yangiriye icyizere'

Luis Suarez

Ahavuye isanamu, Reuters

Insiguro y'isanamu,

Luis Suarez yirutse asiga abakinnyi ba Real Valladolid yinjiza igitego cye cya 21 muri La Liga cyo muri uyu mwaka wa mbere akiniye Atletico Madrid

Luis Suarez yavuze ko ashimira Atletico Madrid kubera "kungirira icyizere" nyuma yuko igitego cye cy'intsinzi kiyifashije gutesha mucyeba Real Madrid igikombe cya shampiyona ya La Liga bahataniraga, ikaba ari yo icyegukana.

Iyi kipe y'umutoza Diego Simeone, ku munota wa 18 yari yabanjwe igitego na rutahizamu Oscar Plano wa Real Valladolid.

Ariko yaje guhindura umukino mu gice cya kabiri ku gitego cya Angel Correa ku munota wa 57 n'icya Suarez cy'intsinzi cyo ku munota wa 67.

Nubwo Real Madrid yatsinze Villarreal ibitego 2-1, ntabwo yashoboye kwegukana icyo gikombe kuko byasabaga ko Atletico itakaza amanota.

Umunya-Uruguay Suarez, w'imyaka 34, yatangiye uyu mwaka w'imikino abwirwa n'umutoza Ronald Koeman wa Barça ko atari muri gahunda ze muri uyu mwaka, ariko yaje gutsinda ibitego 21 muri shampiyona - birimo n'icyahesheje Atletico igikombe.

Nyuma y'umukino, Suarez wari uri mu marira y'ibyishimo yagize ati: "Nshimishijwe n'ukuntu Atletico yampaye agaciro ikampa amahirwe yo gukomeza kwerekana ko nshoboye gukina kuri uru rwego. Ndayishimiye kubera kungirira icyizere".

"Hari abantu benshi twagiriye ibibazo hamwe, umugore wanjye, abana banjye".

"Maze imyaka myinshi nkina umupira w'amaguru gusa uyu ni wo mwaka umuryango wanjye wababayemo cyane. Ndumva niyumva mu buryo butangaje kubera ko nigaragaje ku munsi wa nyuma w'umwaka w'imikino".

Ahavuye isanamu, Reuters

Insiguro y'isanamu,

Iki kibaye igikombe cya 11 cya shampiyona Atletico Madrid yegukanye

Atletico yegukanye igikombe cya mbere cya shampiyona mu myaka irindwi ishize - kikaba n'icya 11 yegukanye muri rusange.

Isoje ifite amanota 86, irusha amanota abiri Real Madrid yegukanye icyo mu mwaka ushize, iyi ikaba isoje uyu mwaka nta gikombe yegukanye.

Barcelona - yakinaga idafite rutahizamu Lionel Messi wari uri mu kihuruko yitegura imikino y'igikombe cya Copa America ihuza ibihugu byo muri Amerika y'epfo - yagiye ku kibuga cya Eibar iyihatsindira igitego 1-0, cyinjijwe na Antoine Griezmann, bituma isoza shampiyona ku mwanya wa gatatu, imbere ya Sevilla.

Sevilla, y'umutoza Julen Lopetegui, irakina umukino wayo wa nyuma wa shampiyona kuri iki cyumweru ikina na Alaves.

Ariko inawutsinze ni ho ha handi yaguma ku mwanya wa kane kubera ko mu mikino yayihuje na Barça, iyi Barça ni yo yatsinze myinshi.

Ahavuye isanamu, Reuters

Insiguro y'isanamu,

Hanze y'ikibuga Jose Zorrilla i Valladolid, abafana ba Atletico Madrid bishimiye ko ikipe yabo yegukanye igikombe cya shampiyona