Afrobasket 2021: Tunisia na Cote d’Ivoire ni iyihe iri butsinde kuri final?

Souleyman Diabate yafashije cyane Cote d'Ivoire gutsinda Sénégal

Ahavuye isanamu, FERWABA

Insiguro y'isanamu,

Souleyman Diabate yafashije cyane Cote d'Ivoire gutsinda Sénégal

Aya makipe yombi ataratsindwa umukino n'umwe kuva yagera i Kigali mu gikombe cya Africa cya basketball uyu munsi arahurira ku mukino wa nyuma saa kumi n'imwe.

Mu mikino irimo ubuhanga bwo hejuru ya demi-final, Tunisia yatsinze Cap-Vert ku manota 75 - 65, na Côte d'Ivoire itsinda Sénégal neza neza gutyo amanota 75 - 65.

Tunisia ifite abakinnyi b'abahanga cyane mu gutera mu nkangara no kugarira, baburijemo Walter Tavares umukinnyi ukomeye kandi uretshya na 2,21m ikipe ya Cap-Vert yubakiyeho.

Naho Côte d'Ivoire ibifashijwemo cyane na Matt Castello hamwe na Souleyman Diabate babashije gutsinda Sénégal yahabwaga amahirwe yo kuba yanegukana iri rushanwa.

Boniface Ndong, umutoza wa Sénégal yavuze ko "turababaye cyane gutsindirwa hano kuko intego yacu yari igikombe".

Mu gihe umutoza Ignacio Lezcano wa Côte d'Ivoire yemeza ko bakoze "akazi gakomeye", agasigaye ari ko gakomeye kurushaho "gutsinda Tunisia" ku mukino wa nyuma.

Côte d'Ivoire ni ubwa mbere igeze ku mukino wa nyuma kuva mu 2009 ubwo bahatsindiwe na Angola.

Ahavuye isanamu, FERWABA

Insiguro y'isanamu,

Tunisia yuggariye cyane Tavares maze ibasha gutsinda Cap Vert

Tunisia yo, iheruka ku mukino wa nyuma muri Afrobasket iheruka yari yakiriye iwayo, ikanayitwara itsinze Nigeria.

Ibyo wamenya kuri uyu mukino

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Tunisia yerekanye ko ishaka iki gikombe kuva ikina umukino wafunguye iri rushanwa igatsinda Guinea 82-46.

Imikino yayigoye ni uwo yatsinzemo Misiri amanota 87-81, hamwe n'umukino yaraye itsinzemo Cap-Vert muri demi-final.

Côte d'Ivoire yageze aha itsinze bitayigoye Kenya, Guinea na Mali, ariko gutsinda Nigeria (No.1 muri Africa) na Sénégal (No.4) byatumye benshi bayibazaho.

Ubwo aya makipe ubwo aheruka guhura mu irushanwa Tunisia yatsinze Côte d'Ivoire ku manota 60 kuri 57 mu 2011 muri Afrobasket yabereye i Antananarivo muri Madagascar, ari naho Tunisia yegukaniye igikombe cyayo cya mbere cy'iri rushanwa.

Mu byumweru bibiri mbere y'iri rushanwa, Tunisia yatsinze imikino ibiri ya gicuti yakinnye na Côte d'Ivoire bariho bitegura kuza i Kigali.

Ignacio Lezcano utoza Côte d'Ivoire yagize ati: "Ndabizi nibo bahabwa amahirwe. Twakinnye nabo kabiri turi kwitegura kandi baratwishe muri iyo mikino.

"N'ubu biteguye kutwica nanone. Ariko iyi ni basketball. Senegal nayo niyo yahabwaga amahirwe ariko twabashije kubahigika. N'ejo [none ku Cyumweru] tuzagerageza kubikora nanone."

Uyu munsi mbere y'umukino w'aya makipe, saa saba n'igice Sénégal irabanza ikine na Cap-vert mu gushaka ifata umwanya wa gatatu n'uwa kane.