Real Madrid iranenga imisifurire

Abakinnyi ba Barcelone na Real Madrid Uwufise ububasha kw’isanamu AP
Image caption Abakinnyi ba Barcelone na Real Madrid

Umukino wa mbere wa kimwe cya kabiri cya Champions League waranzwe n'amahane menshi urangira Barcelona itsinze 2-0 ariko Real ivuga ko yarenganijwe n'abasifuzi.

Ku mukino wo kwishyura igitego cya Gonzalo Huguain wa Madrid cyanzwe n'umusifuzi mu gihe igice cya mbere cyari cyarangiye ari 0-0.

Umukino waje kurangira amakipe yombi anganya 1-1 ariko Christiano Ronaldo kimwe n'umuzamu Iker Casillas bagaragaje ko batishimiye imyitwarire y'umusifuzi.

Christiano Ronaldo, ushobora kugirana n'ibibazo n'ishyirahamwe rya UEFA, yavuze ko abasifuzi bakunze guhengamira ku ikipe ya Barcelone.

Umusifuzi yanga igitego cya Huguain yavuze ko mugenzi we Ronaldo yari yakoze ikosa, ikosa nyirubwite atemera.

Ronaldo ati: "twumvaga byashobokaga kuba twatsinda Barca ariko umusifuzi yongeye kutubangamira."

Ku mukino ubanza nabwo umutoza Josee Morinho wa Real yari yeretswe ikarita y'umutuku. Iyi ikaba ari yo mpamvu umukino wo kwishyura wari uyobowe n'umutoza wungirije Aitor Karanka na we wanenze cyane umusifuzi Frank de Bleeckere.

Christiano Ronaldo wari wababaye bigaragara we yatangaje niba ibintu bikomeje uko bimeze Real yajya yigumira iwayo Barcelone igahabwa igikombe itiriwe ijya mu kibuga.

Umutoza wa Barcelona Pep Guardiola we yirinze kwinjira muri iyi ntambara y'amagambo.

Ati: "Nta mwanya w'amagambo mfite, mpangayikishijwe no kumenya ikipe tuzahura ku mukino wa nyuma."