Iperereza ku gitero cy'abakinnyi ba Nigeria

Nosa Igiebor
Image caption Umukinnyi Nosa Igiebor uvugwa ho ko yakomerekejwe n'igitero

Urwego rw'ubuyobozi mu ishyirahamwe ry'umupira w'amaguru muri Ethiopiya rwavuze ko rugiye gukora iperereza ku gitero Nigeria ivuga ko cyagabwe ku bakinnyi bayo.

Nigeria ivuga ko ku cyumweru abafana b'ikipe ya Ethiopiya bateye bisi yari itwaye abakinnyi ba Nigeria bari baje muri Ethiopiya gukina umukino wo guhatanira umwanya wo kuzakina imikino ya nyuma mu irushanwa ry'igikombe cy'isi cy'umupira w'amaguru rizabera muri Bresil umwaka utaha.

Nigeria yavuze ko ikirahure k'idirishya cyakomerekeje umukinnyi wo hagati, Nosa Igiebor, igihe bisi yari itwaye abakinnyi yavaga kuri sitade nyuma yo gutsinda Ethiopiya 2-1.

Nigeria ivuga ko yagejeje ibirego kuri FIFA.

Umukuru mushya w'ishyirahamwe ry'umupira w'amaguru muri Ethiopiya, Juniedin Basha, yavuze ko babonye ibyegeranyo bivuga ko hari igitero cyagabwe kuri abo bakinnyi.

Yagize ati: "Hamwe n'abashinzwe umutekano, turi gukora iperereza kubyabaye. Twizeye ko tuzabona ibisubizo vuba."

Aya makipe azongera guhura mu mujyi wa Calabar muri Nigeria ku itariki ya 16 z'ukwezi kwa cumi na rimwe.