Eritrea ntizakinira igikombe cy'Afrika

Image caption Eritrea ntizitabira igikombe cy'Afrika

Ishyirahamwe rw'umupira w'amaguru muri Afrika ryatangaje ko Eritrea itazitabira igikombe cy'Afrika muri Maroc.

Icyo gihugu cyari gitegerejwe guhangana na Sudani y'epfo mu kiciro cya mbere mu mikino ibiri mu kwezi kwa kane.

Ibi bivuga ko Sudani y'epfo, inshuro ya mbere icyo gihugu giserukiye iyi mikino, izakomeza mu kiciro cya kabiri.

Nta mpamvu Eritrea yatanze kuba icyo gihugu kitazitabira igikombe cy'Afrika, ariko kuba hashije igihe abakinnyi bava muri iyo kipe bishobora kuba biri mu byatumye icyo cyemezo gifatwa.

Abakinnyi 17 bakomoka muri Eritrea, hamwe n'umuganga wa ekipe, babuze mw'irushanwa ry'igikombe cya CECAFA ryabereye muri Uganda mu 2012.

Mu 2011, abakinnyi 13 bo muri Eritrea basabye ubuhungiro muri Tanzania nyuma y'iro rushanwa, n'aho abandi 12 baburiye muri Kenya mu 2009, aho basabye ubugungiro nyuma y'irushanwa ryo mu karere.

Nyuma y'imikino ya olympique mu Bwongereza mu 2012, abanonotsi bane bo muri Eritrea bavuye aho babaga, basaba ubuhungiro.

Umwaka ushize icyegeranyo cy'umuryango w'abibumbye cyavuze ko abantu bakomoka muri Eritrea babarirwa hagati ya 2000 na 3000 bahunga ako gahugu gato kari mu burasirazuba bw'Afrrika buri kwezi.

Sudani y'epfo izamenyeshwa igihugu bazahura mu mwanya wa kabiri nyuma y'itangazwa ry'amakipe azakina kw'itariki ya 27 z'ukwezi kwa kane mu Misiri.