Ingaruka za Ebola ku ikipe ya Sierra Leone

Ebola ivugwa cyane muri Sierra Leone, Liberia na Guinee. Uwufise ububasha kw’isanamu AP
Image caption Ebola ivugwa cyane muri Sierra Leone, Liberia na Guinee.

Umukinnyi wo hagati w’ikipe y’umupira w’amaguru y’igihugu cya Sierra Leone, Michael Lahoud, yavuze ko bagenzi be bakinana bafatwa nabi kandi ngo bumva batewe isoni n’icyorezo cya Ebola.

Kubera icyorezo cya Ebola, ikipe ya Sierra Leone imikino yagombaga gukinira iwayo mu guhatanira itike yo gukinira igikombe cya Afurika cy’ibihugu iyikinira mu bindi bihugu.

Michael Lahoud yabwiye BBC ko hari aho batemererwa kwinjira kubera ko abantu bahita bakeka ko bafite Ebola; kuri we ngo iryo ni ivangura.

Uyu mukinnyi w’imyaka 28 y’amavuko yongeyeho kandi ko hari n’abakinnyi b’ikipe baba bagomba gukina banga kubasuhuza babakora mu ntoki ngo batandura Ebola.

Ngo hari n’abafana b’amakipe baba bahanganye baririmba Ebola muri sitade.

Benshi mu bakinnyi b’ikipe y’igihugu ya Sierra Leone bakinira amakipe yo mu Burayi, Asia na Leta zunze ubumwe za Amerika kandi guhera mu kwezi kwa karindwi ntabwo bari bakandagiza ikirenge mu gihugu cyabo.