જ્યારે શાસ્ત્રીજીએ PNBમાંથી લોન લઈને કાર ખરીદી હતી
Image copyright
LB MEMORIAL
પંજાબ નેશનલ બૅંકના પ્રબંધને ક્યારેય વિચાર્યું પણ નહીં હોય કે નીરવ મોદી પ્રકરણના કારણે તેમની આ રીતે બદનામી થશે.
જે રીતે લોકો આજે નીરવ મોદી દ્વારા કરવામાં આવેલી છેતરપીંડીનું ઉદાહરણ આપી રહ્યા છે, એ જ રીતે પીએનબીના ગ્રાહક રહી ચૂકેલા પૂર્વ વડાપ્રધાન લાલ બહાદુર શાસ્ત્રીની ઇમાનદારીનું ઉદાહરણ પણ આપી શકાય છે.
લાલ બહાદુર શાસ્ત્રીજી વડાપ્રધાન બન્યા ત્યાં સુધી તેમની પાસે પોતાનું ઘર તો દૂરની વાત છે, એક નાની કાર પણ ન હતી.
એક વખત શાસ્ત્રીજીના બાળકોએ ફરિયાદ કરી કે હવે તો તમે વડાપ્રધાન છો. હવે આપણી પાસે એક કાર હોવી જોઈએ.
તમને આ પણ વાંચવું ગમશે
- પંજાબ નેશનલ બૅંક બનવાની રસપ્રદ કહાણી
- PNB કૌભાંડથી સુરતના હીરા ઉદ્યોગને અસર થશે?
- જ્યારે નીરવ મોદીએ કહ્યું 'ડૂ નોટ ડિસ્ટર્બ'
એ જમાનામાં એક ફિએટ કાર 12 હજાર રૂપિયામાં આવતી હતી. તેમણે પોતાના એક સચિવને કહ્યું કે જરા જુઓ તો બૅંક ખાતામાં કેટલા રૂપિયા છે.
તેમના બૅંક ખાતામાં માત્ર સાત હજાર રૂપિયા હતા.
લાલ બહાદુર શાસ્ત્રીના દીકરા અનિલ શાસ્ત્રીએ બીબીસીને જણાવ્યું હતું, "જ્યારે અમને ખબર પડી કે શાસ્ત્રીજી પાસે કાર ખરીદવા માટે પર્યાપ્ત પૈસા બચ્યાં નથી, તો અમે તેમને કહ્યું કે કાર ખરીદશો નહીં."
પરંતુ શાસ્ત્રીજીએ કહ્યું કે તેઓ બાકીના પૈસા બૅંકમાંથી લોન લઇને ચૂકવશે. તેમણે પંજાબ નેશનલ બૅંક પાસેથી કાર ખરીદવા માટે પાંચ હજાર રૂપિયાની લોન લીધી હતી.
એક વર્ષ બાદ લોનની ચૂકવણી પહેલા જ શાસ્ત્રીજીનું નિધન થઈ ગયું.
લાલ બહાદુર શાસ્ત્રી બાદ ઇંદિરા ગાંધી વડાંપ્રધાન બન્યા હતા અને તેમણે સરકાર તરફથી લોન માફ કરવાની રજૂઆત કરી હતી.
પરંતુ તેમનાં પત્ની લલિતા શાસ્ત્રીએ તેનો અસ્વીકાર કર્યો અને લાલ બહાદુર શાસ્ત્રીના મૃત્યુના ચાર વર્ષ સુધી પેન્શનની રકમથી લોન ચૂકવી.
અનિલ જણાવે છે કે જ્યાંજ્યાં તેમનું પોસ્ટિંગ થયું હતું, તેઓ એ કાર સાથે લઈ ગયા હતા.
આ કાર હજુ પણ દિલ્હી સ્થિત લાલ બહાદુર શાસ્ત્રી મેમોરિયલમાં રાખવામાં આવી છે અને દૂર-દૂરથી લોકોને તેને જોવા માટે આવે છે.
તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો