સુરત સાથે નાતો ધરાવનારાં અને દિગ્વિજય સિંહ સામે લડનારાં પ્રજ્ઞા ઠાકુર કોણ છે?

સુરતમાં ઠાકુરના નિવાસસ્થાનની ફાઇલ તસવીર Image copyright Dharmesh Joshi
ફોટો લાઈન સુરતમાં ઠાકુરના નિવાસસ્થાનની ફાઇલ તસવીર

માલેગાંવ બ્લાસ્ટ કેસમાં નિર્દોષ છૂટેલાં સાધ્વી પ્રજ્ઞા ઠાકુર બુધવારે ભાજપમાં જોડાયાં અને ભાજપે તેમને મધ્ય પ્રદેશની પ્રતિષ્ઠિત ભોપાલ બેઠક પરથી ઉમેદવાર બનાવ્યાં છે.

ભોપાલની બેઠક ઉપરથી કૉંગ્રેસે પૂર્વ મુખ્ય પ્રધાન દિગ્વિજય સિંહને ઉમેદવાર જાહેર કર્યા છે.

પ્રજ્ઞા સ્તનકૅન્સરથી પીડિત છે અને તેમની સારવાર ચાલી રહી છે.

1989થી ભોપાલને ભાજપનો ગઢ માનવામાં આવે છે. શિવરાજ સિંહ ચૌહાણ, નરેન્દ્ર સિંહ તોમર તથા ઉમા ભારતીને આ બેઠક ઓફર થઈ હતી, પરંતુ તેમણે ચૂંટણી લડવાનો ઇન્કાર કરી દીધો હતો.


પ્રજ્ઞા ઠાકુર અને સુરત

Image copyright Dharmesh Joshi
ફોટો લાઈન પ્રજ્ઞા ઠાકુરની તસવીર સાથે તેમના પિતાની ફાઇલ તસવીર

મધ્ય પ્રદેશમાં ચંબલના ભીંડમાં તેમનો ઉછેર થયો. તેમના પિતા રાષ્ટ્રીય સ્વયંસેવક સંઘ સાથે જોડાયેલા હતા.

ઇતિહાસમાં અનુસ્નાતક પ્રજ્ઞા શરૂઆતથી જ જમણેરી વિચારસરણી ધરાવતાં હતાં. તેઓ સંઘની વિદ્યાર્થી પાંખ અખિલ ભારતીય વિદ્યાર્થી પરિષદ તથા વિશ્વ હિંદુ પરિષદની મહિલા પાંખ દુર્ગાવાહિની સાથે સંકળાયેલાં હતાં.

તેમણે 'લવજેહાદ' સામે અભિયાન છેડ્યું હતું. તેઓ મધ્ય પ્રદેશ અને ગુજરાતમાં ફરીને તેજાબી ભાષણો આપતાં.

જોકે, બાદમાં તેમણે સંસાર ત્યજી દીધો અને ભગવો ધારણ કરી લીધો.

ત્યારબાદ તેઓ સુરતમાં સ્થિર થયાં અને પુણા ગામ ખાતે આશ્રમ સ્થાપ્યો.

NIA (નૅશનલ ઇન્વેસ્ટિગેશન એજન્સી)ની ચાર્જશિટ પ્રમાણે, આશ્રમની આડમાં તેઓ 'અભિનવ ભારત' નામના ઉગ્રપંથી સંગઠન સાથે સંકળાયેલાં હતાં.

એ જ રીતે અને માલેગાંવ બ્લાસ્ટ તથા સુનીલ જોશી મર્ડર કેસમાં પણ તેમનું નામ સામે આવ્યું હતું.

તમે આ વાંચ્યું કે નહીં?

'હિંદુ ઉગ્રવાદ'

Image copyright ANI
ફોટો લાઈન દિગ્વિજય સિંહની સામે ચૂંટણી લડશે ઠાકુર

સપ્ટેમ્બર-2008માં મહારાષ્ટ્રની ઍન્ટિ-ટૅરરિસ્ટ સ્ક્વૉડે માલેગાંવ બ્લાસ્ટના કેસમાં તેમની ધરપકડ કરી હતી. એ સમયે હેમંત કરકરે સ્કવૉડના વડા હતા.

એ બ્લાસ્ટમાં આઠ લોકોનાં મૃત્યુ થયાં હતાં, જ્યારે 80થી વધુ લોકો ઘાયલ થયા હતા.

બ્લાસ્ટમાં વપરાયેલું સ્કૂટર પ્રજ્ઞા ઠાકુરના નામે નોંધાયેલું હતું.

સાધ્વીએ તેમના બચાવમાં કહ્યું હતું કે તેમણે વર્ષ 2004માં એ સ્કૂટર વેચી દીધું હતું.

2011માં એનઆઈએએ આ કેસ સંભાળ્યો. જોકે, કેન્દ્રમાં મોદી સરકાર બન્યા બાદ તપાસ એજન્સીના વલણમાં નાટ્યાત્મક પરિવર્તન આવ્યું હતું અને તેમને જામીન મળી શક્યા.

એપ્રિલ-2017માં જામીન મળ્યા તે પહેલાં નવ વર્ષ તેઓ જેલમાં રહ્યાં હતાં.

આ દરમિયાન લેફ્ટનન્ટ કર્નલ શ્રીકાંત પુરોહિત, સ્વામી અસીમાનંદ અને સાધ્વી પ્રજ્ઞા ઠાકુર પર 'હિંદુ ઉગ્રવાદ' ફેલાવવાનો આરોપ લાગ્યો હતો.


હિંદુ ઉગ્રવાદનો મુદ્દો

Image copyright Reuters
ફોટો લાઈન માલેગાંવમાં બે વિસ્ફોટ થયા હતા

2010માં કૉંગ્રેસના તત્કાલીન મહાસચિવ દિગ્વિજય સિંહે તત્કાલીન વડા પ્રધાન ડૉ. મનમોહન સિંઘને પત્ર લખીને અલગઅલગ ઉગ્રવાદી પ્રવૃત્તિઓમાં હિંદુવાદી સંગઠનોની સંડોવણી અંગે સવાલ ઊભા કર્યા હતા.

સપ્ટેમ્બર-2008માં તત્કાલીન ગૃહ પ્રધાન શિવરાજ પાટિલને પત્ર લખીને આ મુદ્દો ઉઠાવ્યો હતો.

વડા પ્રધાન નરેન્દ્ર મોદીએ તાજેતરમાં કહ્યું હતું કે, 'કૉંગ્રેસ કાન ખોલીને સાંભળી લે, હિંદુ આતંકવાદી ન હોઈ શકે.'

ત્યારે એવું માનવામાં આવે છે કે ચૂંટણીપ્રચારમાં આ મુદ્દો ફરી ગૂંજશે.

એપ્રિલ-2018માં ઠાકુરે અણસાર આપ્યા હતા કે તેઓ રાજકારણમાં જોડાશે.

પ્રજ્ઞા ઠાકુરે કહ્યું કે 'ભગવાને ફરી સન્માન અપાવીશ અને દેશને સુરક્ષિત બનાવીશ.'


કૅન્સરપીડિત ઠાકુર

વર્ષ 2013માં સાધ્વી પ્રજ્ઞા ઠાકુરને સ્તનકૅન્સર હોવાનું નિદાન થયું હતું. તેમનાં જેલવાસ દરમિયાન જ તેમની સારવાર ચાલતી રહી.

પ્રજ્ઞા ઠાકુરે કૅન્સર માટે ઍલૉપથી ઉપરાંત આયુર્વેદ અને પંચકર્મની સારવાર કરાવી હતી. તેમના પિતા આયુર્વેદમાં પ્રૅક્ટિસ કરતા હતા.

તેમણે જેલવાસ દરમિયાન અનેક વખત આરોગ્યના આધાર પર જામીન માગ્યા હતા.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો