Chandrayaan2 : ઈસરોએ ચંદ્રયાન-2નું લૉન્ચિંગ ટેકનિકલ કારણસર ટાળ્યું

ચંદ્રયાન-2 Image copyright Twitter/ISRO

ઇંડિયન સ્પેસ રિસર્ચ ઑર્ગેનાઇઝેશન (ઈસરો)એ ટેકનિકલ કારણોસર ચંદ્રયાન-2નું લૉન્ચિંગ ટાળી દીધું છે.

પૂર્વાયોજન પ્રમાણે સોમવારે રાત્રે બે વાગ્યે અને 51 મિનિટે આંધ્રપ્રદેશના શ્રીહરિકોટા ખાતેથી ચંદ્રયાન-2નું લૉન્ચિંગ થવાનું હતું.

ઈસરોએ ટ્વીટ કરીને માહિતી આપી હતી કે સાવચેતીના પગલાંરુપે લૉન્ચિંગ અટકાવવામાં આવ્યું છે અને ટૂંક સમયમાં નવી તારીખની જાહેરાત કરવામાં આવશે.

ચંદ્રયાન-1ની સફળતા બાદ ઈસરોએ ચંદ્રયાન-2નો પ્રોજેક્ટ હાથ ધર્યો હતો. આ મિશન દ્વારા ઈસરો ચંદ્રના દક્ષિણ ધ્રુવ ઉપર ઊતરશે, જ્યાં આજદિવસ સુધી વિશ્વનો કોઈ દેશ પહોંચ્યો નથી.

ભારતના અવકાશ મિશનમાં ચંદ્રયાન-2નું અનેરું મહત્ત્વ રહેલું છે. તેને ધ્યાને લઈને લૉન્ચિંગ સમયે રાષ્ટ્રપતિ રામનાથ કોવિંદ પણ શ્રીહરિકોટા ખાતે હાજર હતા.

આ મિશન માટે ઈસરોનું કહેવું છે કે તેનું લક્ષ્યાંક ચંદ્રની સપાટીને સમજવાનું તથા ભારત તેમજ સમગ્ર માનવજાત માટે સંશોધન કરવાનું છે.


કઈ રીતે લૉન્ચિંગ થવાનું હતું?

Image copyright Twitter/ISRO

3.8 ટન વજનનું ચંદ્રયાન-2 લગભગ 640 ટન વજન ધરાવતા જીએસએલવી માર્ક-3 રૉકેટ દ્વારા અંતરીક્ષમાં મોકલવામાં આવનાર હતું.

આ રૉકેટને 'બાહુબલી' એવું ઉપનામ આપવામાં આવ્યું છે. આ રૉકેટ ભારતનું સૌથી તાકતવર રૉકેટ છે તથા તે લગભગ 15 માળ ઊંચું છે. મિશન ચંદ્રયાન-2માં ત્રીજી વખત આ રૉકેટનો ઉપયોગ થશે.

ચંદ્રયાન-2 મિશનનો હેતુ ચંદ્રની સપાટી ઉપર પાણીને શોધવાનો છે. લૉન્ચિંગના લગભગ બે મહિના બાદ ત્રણ લાખ 84 હજાર કિલોમિટરની યાત્રા પૂર્ણ કરીને ચંદ્રયાન-2 ચંદ્ર ઉપર પહોંચશે.


'મેડ ઇન ઇંડિયા' ચંદ્રયાન-2

Image copyright Getty Images

ચંદ્રયાન-2માં ઑર્બિટર, લૅન્ડર તથા રૉવર છે અને આ ત્રણેયનું નિર્માણ ભારતમાં જ થયું છે.

જો ભારતનું મિશન સફળ થાય તો ચંદ્રની સપાટી ઉપર સૉફ્ટ લૅન્ડિંગ કરાવનારા દેશો અમેરિકા, રશિયા તથા ચીનની યાદીમાં સામેલ થઈ જશે.

ચંદ્રયાન-2ના રૉવરને 'પ્રજ્ઞાન' એવું નામ આપવામાં આવ્યું છે. તે પૃથ્વીના સમય પ્રમાણે, 14 દિવસ સુધી જરૂરી પ્રયોગો કરશે.

ચંદ્રયાન-2 બાદ ભારતનું બીજું મહત્ત્વાકાંક્ષી મિશન 'ગગનયાન' છે, જે હેઠળ વર્ષ 2022માં માનવને અંતરીક્ષમાં મોકલવાનો છે.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો

આ વિશે વધુ